Il-Qorti Kriminali mill-ġdid ċanfret l-imġieba persistenti tal-eks Deputat Nazzjonalista u Avukat ta’ Repubblika Jason Azzopardi, fost oħrajn.
Dan permezz tal-Imħallef Edwina Grima li qed tippresjedi l-każ ta’ qtil ta’ Daphne Caruana Galizia.
Dan wara li Jason Azzopardi ttella’ jixhed wara rikors fil-konfront tiegħu fejn ġie allegat mid-Difiża fil-każ, li kiser digriet tal-istess Qorti Kriminali mogħti mill-imħallef Edwina Grima ftit tal-jiem ilu wara intervista li ta Jason Azzopardi.
Ftit tal-jiem ilu l-istess Qorti ddikjarat li kummenti li ta fl-aħħar jiem l-eks Deputat Nazzjonalista Jason Azzopardi, jippreġudikaw ġuri ġust fil-konfront tal-akkużat, Yorgen Fenech.
F’din l-istess intervista, l-eks Deputat Nazzjonalista u avukat tal-għaqda Repubblika allega li l-provi kollha jippontaw lejn Yorgen Fenech. Fid-deċiżjoni tagħha, l-Imħallef Grima kienet sostniet li tali kummenti jinterferixxu fl-amministrazzjoni tal-ġustizzja u anke jinfluwenzaw lill-ġurati, li għadhom iridu jintagħżlu fil-proċess għall-ġuri. Għalhekk kienet ordnat li jitneħħew partijiet mill-intervista.
Hekk kif itella’ jixhed quddiem l-Imħallef Edwina Grima, Jason Azzopardi ġie mistoqsi dwar 3 posts partikolari fuq Facebook. Waħda kienet tinvolvi t-tixrid ta’ post ta’ Robert Aquilina, ħu Karol Aquilina tal-Partit Nazzjonalista. Din kienet titratta lill-akkużat fil-kawża Yorgen Fenech u l-proklama li kien talab.
Fil-fatt, l-Imħallef Grima ordnatlu jneħħi dawn il-posts minn fuq il-pjattaforma soċjali tiegħu hekk kif sostniet li mhux jagħraf il-konsegwenzi ta’ kitbietu.
Sadanittant wara argumenti miż-żewġ naħat waqt l-istess seduta, l-Imħallef ordnat sabiex il-midja ma tikkwotax li kiteb Jason Azzopardi fil-posts tiegħu.
Dan apparti li l-Imħallef sostniet li jekk din l-imġieba tippersisti, hija se tkun qed tkompli tisma’ l-każ bil-bibien magħluqa.
Kienu bosta li fil-jiem li għaddew irreaġixxew għall-imġieba ta’ Jason Azzopardi, fosthom il-Prim Ministru Robert Abela fejn irrimarka li bid-deċiżjoni tagħha dwar l-Avukat tar-Repubblika, il-Qorti ħadet deċiżjoni li tipproteġi l-proċess ġudizzjarju mill-attakki perikolużi fuq l-integrità tal-proċess li għamlu nies tal-Oppożizzjoni.
Apparti minn hekk il-pubblikatur tal-MaltaToday Saviour Balzan nnota kif l-aġir ta’ Azzopardi huwa wieħed orribbli u li jsaħħaħ id-difiża ta’ Fenech.
