- Il-Ministri responsabbli mill-qasam tal-ġustizzja tal-Olanda u l-Lussemburgu jinsabu hawn Malta.
Kliem ta’ tifħir mill-Ministru tal-Olanda u l-Lussemburgu għall-preparamenti tal-Ministeru għall-Ġustizzja għal waqt il-Presidenza Maltija.
Il-Ministru għas-Sigurtà u Ġustizzja tal-Olanda, Ard Van der Steur u l-Ministru għall-Ġustizzja tal-Lussemburgu, Felix Braz, kellhom kliem ta’ tifħir għall-Malta, b’referenza għall-Ministeru għall-Ġustizzja, minkejja l-isfidi fl-aġenda ta’ dan is-settur. Waqt il-konferenza tal-aħbarijiet, il-Ministri saħqu ukoll li Malta tinsab preparata sabiex tieħu f’idejha it-tmexxija tal-Presidenza Maltija Tal-Kunsill tal-Unjoni Ewropea.
Waqt l-istess konferenza l-Ministru spjega kif it-tliet Ministri dduskutew il-proposti legiżlattivi fis-settur tal-Ġustizzja u l-prijoritajiet ta’ Presidenza Maltija għal dan is-settur. Filfatt, il-Ministru Bonnici tenna kif f’dan is-settur Malta se timmira li tagħlaq il-proposti legiżlattivi pendenti fosthom il-proposta għat-twaqqif tal-Uffiċċju tal-Prosekutur Pubbliku Ewropew, min-naħa tal-liġi kriminali, u l-proposti dwar ċerti aspetti li jikkonċernaw il-kuntratti għall-provvista ta’ kontenut diġitali u l-kuntratti għall-bejgħ onlajn u bejgħ mill-bogħod ieħor ta’ oġġetti, min-naħa tal-liġi ċivili. Fl-istess waqt Malta se tkun qed tmexxi diskussjonijiet dwar proposti ġodda.
Suġġett ieħor li ġie diskuss mit-tliet Ministri huwa il-Jum Ewropew kontra l-impunità għad-delitt tal-ġenoċidju, delitti kontra l-umanità u delitti tal-gwerra li se jkun iċċelebrat għat-tieni darba waqt il-Presidenza Maltija. Dwar dan, il-Ministru tenna kif hi ta’ sfortuna li dawn ir-reati għadhom qed iseħħu sal-ġurnata tal-lum. Huwa kompla jghid li permezz ta’ din il-gurnata il-Presidenza Maltija se tkompli żżid l-għarfien dwar l-importanza li tittieħed azzjoni kontra dawn ir-reati.
B’referenza għall-klima kurrenti tal-politika Ewropea, Bonnici saħaq fuq il-bżonn li l-Unjoni Ewropea taddotta politika li tressaq lill-Unjoni aktar viċin iċ-ċittadin. Il-Ministru Bonnici bbaża dan fuq il-fatt li lil hinn min-nazzjonalità tal-persuna, aħna lkoll ċittadini Ewropej u din l-istess ċittadinanza għandha sservi biex tgħaqqad l-istati membri tal-Unjoni Ewropea u ċ-ċittadini tagħhom lkoll flimkien.
Il-Ministru Bonnici temm id-diskors tiegħu billi saħaq fuq l-importanza li Malta sservi ta’ pont li jgħaqqad minkejja id-differenzi tal-istati membri u b’hekk Malta, flimkien mal-Istati Membri l-oħra taħdem bħala parti minn Ewropa aktar viċin iċ-ċittadin.
Aktar kmieni, saret ukoll laqgħa bejn it-tliet Ministri sabiex jiddiskutu l-aħħar preparamenti, fis-settur tal-Ġustizzja, għall-Presidenza Maltija Tal-Kunsill tal-Unjoni Ewropea li se tibda fil-ġranet li ġejjin.
