Permezz tal-proġett ‘All Equal’, f’dawn l-aħħar sentejn ġew megħjuna 29 vittma tat-traffikar uman li l-età tagħhom tvarja bejn l-20 u l-50 sena.
Dan il-programm kien maħsub mill- Fondazzjoni għas-Servizzi tal-Ħarsien Soċjali u ffinanzjat mill-Asylum Migration and Integration Fund biex jassisti persuni li ġew traffikati, sabiex jegħlbu t-trawmi u jiġu megħjuna biex jintegraw.
Svetlana Buttigieg, manager fi ħdan l-Aġenzija Appoġġ, tgħid li minkejja l-perċezzjoni li l-vittmi tat-traffikar normalment ikunu nisa, ikun hawn ukoll bosta rġiel.
Hija qaltlilna li kull każ ta’ traffikar ikun xprunat mill-qerq, fejn jiġu mwiegħda ħajja aħjar u mbagħad jispiċċaw jgħixu f’kundizzjonijiet inumani.
Stqarret magħna li ħafna minnhom jispiċċaw f’din is-sitwazzjoni sabiex isostnu lilhom infushom jew lill-familji tagħhom, għax ikunu darhom mal-ħajt.
Fost dawn il-vittmi, għaxra, li l-maġġoranza tagħhom ġejjin mill-Asja, l-Afrika, u l-Amerika t’Isfel, sabu wkoll refuġju f’xelter.
Fil-fatt, il-materjal li jippromwovi l-programm huwa magħmul fi ħdax il-lingwa differenti, sabiex jilħaq lil kulħadd.
Barra minn hekk, kien hemm 33 persuna oħra li, minkejja li ma kinux qed jiġu traffikati, xorta waħda ġew referuti għas-servizzi tal-aġenzija.
Svetlana Buttigieg spjegatilna modi differenti fejn wieħed ikun referut għall-proġett, fosthom il-linja 179, il-paġna ta’ Facebook tal-aġenzija, u saħansitra minn għaqdiet volontarji, il-Pulizija, u anke social workers tal-Fondazzjoni għas-Servizzi tal-Ħarsien Soċjali.
Hija qaltilna li parti mill-programm kienet li toffri taħriġ lill-frontliners, sabiex isiru aktar familjari ma’ sinjali li jindikaw l-abbuż.
Qalet, “Eżempju, kellna każ partikolari, li ġie identifikat fl-Isptar, fl-Oncology Centre. Hemmhekk indunajna li kien hemm persuna li kellha bżonn l-għajnuna, indunaw is-social workers tagħna fi ħdan is-SAMOC, u minn hemmhekk aħna stajna nagħtu l-għajnuna lil din il-persuna.”
Hija spjegatilna li l-vittmi normalment isibuha diffiċli biex jafdaw, fid-dawl tal-fatt li jkunu ġew traduti.
Stqarret, “L-ewwel kuntatt huwa dejjem diffiċli. Sakemm issir taf persuna u tibni kuntatt magħha, anke qisu sakemm il-persuna tafdak u tibni relazzjoni magħha, ma tkunx taf sa fejn għandha tasal, sa fejn għandha tgħidlek. Jiġifieri, ħafna drabi, ma jgħidulniex dak li jkunu għaddejjin minnu mill-ewwel. L-informazzjoni tibda ġġibha ftit ftit, sakemm persuna tibda tafdak aktar. Ovvjament trust issues kbar, għax biex ikunu ġew Malta jkunu afdaw lil xi ħadd, xi ħadd li ttradihom.”
Buttigieg qaltilna li, permezz tas-sehem ta’ aġenziji oħra, dawn il-vittmi jiġu legalizzati f’pajjiżna, isibu impjieg xieraq, u eventwalment jgħixu ħajja xierqa, kif ġew imwiegħda.
Hija appellat sabiex jekk xi ħadd ikollu suspett li xi ħadd qed jiġi traffikat, jew inkella hu stess ikun qed jafaċċja din ir-realtà, għandu jċempel fuq il-linja 179 jew fuq in-numru tal-aġenzija, 22959000, fejn jiġu gwidati minn operaturi mħarrġin.
