- Fl-aħħar jiem saret laqgħa f’The Hague bejn investigaturi Maltin u Żvediżi
- Każ ieħor fejn issemma deputat tal-PN u ħammeġ isem Malta
Il-Pulizija Żvediża talbet l-għajnuna tal-Pulizija Maltija biex tgħinha tittraċċa l-biljuni ta’ flus ta’ pensjonanti Żvediżi li ngidmu fil-każ Falcon Funds. Dan il-fond f’nofs l-investigazzjoni kriminali kellu bħala wieħed mid-diretturi tiegħu lil Tonio Fenech. Il-każ ixxokkja l-Iżvezja u għadu sal-lum il-ġurnata jiddomina fl-aħbarijiet Żvediżi.
Rapporti f’ġurnali Żvediżi juru biċ-ċar li l-Pulizija Żvediża intensifikat il-ħidma tagħha u qed tagħmel minn kollox biex issib flus il-pensjonanti li allegatament għaddew b’mod frodulenti minn fond privat għall-fond li tiegħu Tonio Fenech kien direttur. It-tagħrif li daħħlet il-Pulizija Maltija kkonfermajnieh ukoll ma’ mkejjen tagħna fid-Depot tal-Floriana
Fil-fatt għaddejja dik li qed tissejjaħ azzjoni konġunta fejn il-Pulizija Żvediża u dik Maltija qed jaħdmu biex isibu l-flus mitlufa ta’ madwar 22,000 pensjonant li ngidmu mill-Falcon Funds. F’ġurnal Żvediż, Expressen, il-Prosekutur Arne Fores kien kwotat jgħid li l-Pulizija Maltija nediet investigazzjoni kriminali dwar il-każ. Ma’ Expressen, Fores qal li dan kien pass importanti biex tissaħħaħ l-investigazzjoni li qed tagħmel il-Pulizija Żvediża.
“Donnu issa se jkun hemm kooperazzjoni diretta bejn l-Iżvezja u Malta fit-tfittxija tal-biljuni mitlufa u ta’ dawk suspettati li huma responsabbli. Dan jista’ jieħu l-forma ta’ skwadra konġunta bl-għajnuna t’aġenziji Ewropej,” kien kwotat jgħid Fores.
Il-ġurnal Expressen irrapporta li proprju l-ġimgħa li għaddiet, f’The Hague fl-Olanda, saret laqgħa dwar il-każ Falcon Funds. Laqgħa li għaliha attendew pulizija u prosekutur Malti filwaqt li l-Iżvediżi bagħtu erba’ rappreżentanti li tmexxew mill-Prosekutur Żvediż Arne Fors. Il-laqgħa saret taħt il-qafas Ewropew dwar kooperazzjoni Ewropea, EuroJust, Aġenzija Ewropea għall-kooperazzjoni ġudizzjarja li tgħin lill-istati membri tal-Unjoni Ewropea biex ikun hemm iżjed koordinazzjoni u kooperazzjoni fil-ġlieda kontra l-kriminalità.
Intqal li l-investigazzjoni mhix biss għall-flus mitlufa iżda wkoll għall-azzjoni li saret minn Temple Asset Management, il-kumpanija fiduċjarja responsabbli mill-immaniġġjar ta’ flus li faddlu pensjonanti Żvediżi.
Kien lejn tmiem is-sena li għaddiet li tqajmu l-mistoqsijiet dwar fejn marru l-biljuni ta’ flus li tal-Falcon Funds kellhom iroddu lura lill-Aġenzija għall-pensjonijiet. Dan wara li f’Ġunju tas-sena li għaddiet inħarġet ordni ta’ fejda, redemption order, fejn tal-Falcon Funds kellhom iroddu lura sal-inqas ċenteżmu. Il-flus bdew jintraddu lura bil-mod sakemm dan waqaf. Ħaġa li qajmet suspetti t’attività kriminali tant li l-Aġenzija Żvediża għall-Pensjonijiet għaddiet il-każ lill-Pulizija Żvediża u minn hemm bdiet investigazzjoni kriminali fil-konfront tal-Falcon Funds.
Sakemm imbagħad fit-12 ta’ Jannar ta’ din is-sena, l-Awtorità Maltija għas-Servizzi Finanzjarji, l-MFSA, ħatret lill-KPMG biex tieħu f’idejha l-assi tal-Falcon Funds. Deċiżjoni li neħħiet is-saħħa kollha tat-tliet diretturi u issa l-fond qiegħed għand awdituri indipendenti.
Deċiżjoni li ntlaqgħet sew mill-Awtoritajiet Żvediżi għax fissret li se jkollhom stampa ċara u jifhmu aħjar x’ġara minn dan il-fond li minnu ngidmu aktar minn 22,000 pensjonant. Każ li dwaru Tonio Fenech dejjem iddefenda l-pożizzjoni tiegħu, qal li mxew sew mal-klijenti u meta faqqa l-każ qal li l-awtoritajiet Żvediżi għandhom aġenda kontra Malta. Issa li hemm bidu ta’ kooperazzjoni bejn iż-żewġ pajjiżi involuti, il-Prosekutur Arne Fors sostna fuq l-importanza li jkun hemm l-informazzjoni kollha neċessarja. “Ser nagħmlu minn kollox biex nidentifikaw il-persuni li kienu l-moħħ wara dan l-iskandlu u b’hekk nistgħu niżguraw l-assi,” sostna Arne Forse.
