Il-Pulizija sostniet li l-allegazzjonijiet li saru b’rabta mal-elezzjoni ġenerali minn suppost ‘whistleblower’ li warajh hemm Jason Azzopardi u l-Partit Nazzjonalista, kienu allegazzjonijiet bla bażi.
Dan fi tweġibiet lit-Times of Malta li staqsiet dwar l-investigazzjoni tal-pulizija f’dan il-każ, li rriżulta minn allegazzjonijiet li saru f’rikors dwar każ li ma kellu x’jaqsam xejn mas-suġġett.
Entitajiet oħra, bħal Identity Malta, kienu diġà ħarġu ċaħdiet kategoriċi u dettaljati għal dak allegat fil-konfront tagħhom. Anke l-Kummissjoni Elettorali ħarġet stqarrija.
Issa jirriżulta li filwaqt li l-Kap tal-Oppożizzjoni, Bernard Grech, kien qed jattakka lill-Kummissarju tal-Pulizija biex jagħmel pressjoni fuqu, il-Pulizija kienet għaddejja bix-xogħol tagħha.
Mat-Times of Malta, il-Pulizija qalet li kkuntattjat lill-avukati li għamlu l-allegazzjonijiet biex isostnuhom u rċivew biss dettalji dwar persuna waħda li meta mistħarġa sabu li l-allegazzjonijiet kienu bla bażi.
“Unfounded” kienet ir-risposta skjetta tal-Korp tal-Pulizija mat-Times of Malta.
L-esponenti tal-Partit Nazzjonalista għamlu ġimgħat jibnu l-istorja li vvotaw il-mejtin sabiex jagħtu l-impressjoni li tilfu l-elezzjoni b’erbgħin elf vot minħabba l-mejtin.
Biex għamlu dan ibbażaw fuq Palestinjan li qalu li hu whistleblower.
Dan is-suppost whistleblower, bl-isem ta’ Ali Hasan, li qed jorbot fuqu l-Partit Nazzjonalista diġà ntuża mill-Partit Nazzjonalista lura fl-elfejn u sittax meta miegħu saru intervisti għaliex kien qal li kien se jispiċċa bla dar u jorqod barra.
Eventwalment applika għaċ-ċittadinanza Maltija u din ma ngħatatlux.
Fil-fatt, id-deputat Alex Muscat, tkellem kif meta kien responsabbli mis-settur dan il-bniedem heddu li se jpattijilu għax ma kienx ħa ċ-ċittadinanza. Iċ-ċittadinanza ma kienx ħadha għax ma kienx ħaqqu, u għal dan irritalja.
Minbarra lil Jason Azzopardi, dan ir-raġel illum għandu warajh lil Arnold Cassola li qed jużawh bħala parti mill-kampanji ta’ attakki tagħhom kontra min jagħmel parti mill-Gvern.
