L-avukat Joe Brincat huwa l-aħħar minn sensiela ta’ esperti legali li ħarġu jispjegaw kif is-sistema li propona l-gvern għall-ħatra ta’ Kummissarju tal-Pulizija, tagħmel ferm iktar sens minn dik proposta mill-Partit Nazzjonalista.
Fi kliem l-avukat Brincat, li taħtar Kummissarju tal-Pulizija biż-żewġ terzi ma taħdimx u fl-aħħar mill-aħħar jispiċċa jiddeċiedi l-Gvern.
Dr Brincat stqarr: “Din taż-żewġ terzi kull fejn issir hija farsa. It-Taljani x’jagħmlu? Meta jagħżlu lill-President l-ewwel jagħżlu biż-żewġ terzi u ma jġibha ħadd. Imbagħad jgħidu issa maġġoranza sempliċi allura mhux logħob tal-bżallu Mela mhux kulħadd, l-ewwel wieħed taż-żewġ terzi ma taħdimx, it-tieni ma tgħaddix, it-tielet ma tgħaddix imbagħad x’se jiġri mhux l-istess? Il-Gvern tal-ġurnata jiddeċidiedi hu.”
Brincat sostna li fl-ebda pajjiż Ewropew ma jinħatar Kummissarju tal-Pulizija biż-żewġ terzi. Huwa kompla jgħid: “Tistgħu turuna xi pajjiż li kap tal-Pulizija jinħareġ biż-żewġ terzi? Għax l-ebda pajjiż fl-Ewropa ma jagħżel lill-Kummissarju jew il-Kap imma jridu jagħżluh il-politiċi b’mod jew ieħor.”
Fuq kollox hija s-sistema li qed jipproponi l-gvern Malti li tneħħi minn idejn il-gvern il-poter assolut.
Tant li l-Kummissarju se jinħatar wara sejħa pubblika, bil-gvern irid joqgħod għaż-żewġ ismijiet li ttih il-Kummissjoni għas-Servizz Pubbliku.
Kummissjoni kostituzzjonali li dwar il-membri tagħha hemm qbil bejn Gvern u oppożizzjoni.
Dr Brincat temm jgħid: “Issa li l-PSC tagħżel lill-kandidat l-aktar wieħed ideali jew tissuġerih hija xi ħaġa li jekk issa se natakkaw lill-PSC nistgħu naqbdu u narmu l-kostituzzjoni li ġab Gorg Borg Olivier.”
Wara d-deċiżjoni tal-Kummissjoni għas-Servizz Pubbliku se jkun hemm il-grilling ta’ kumitat parlamentari. Brincat jingħaqad ma’ avukati oħra li nnotaw kif il-gvern qed jipproponi sistema b’saħħitha, trasparenti u li taħdem.
