Matul l-2023, id-Diviżjoni għat-Tindif u l-Manutenzjoni ġabret mal-wieħed u għoxrin elf, tliet mija u erbgħin tunellata ta’ skart minn toroq u postijiet pubbliċi.
Minkejja dan, mindu f’Ottubru li għadda tnieda l-Programm Nazzjonali tat-Tindif, bl-akbar investiment f’dan il-qasam, sal-lum diġà tneħħew aktar minn ħamsa u sittin tunellata ta’ skart, wara interventi f’wieħed u għoxrin lokalità.
L-interventi saru minn ħaddiema ta’ din id-Diviżjoni, li qed iduru kull triq u jsiru interventi ta’ knis, qtugħ ta’ ħaxix u tindif ieħor li jiltaqgħu miegħu. Proċess li se jkomplu b’iżjed interventi f’kull lokalità.
Bħala parti mill-Kampanja Nazzjonali għat-Tindif u l-Manutenzjoni, ix-xogħlijiet li qed isiru f’dawn iż-żoni residenzjali jinkludi wkoll interventi ta’ manutenzjoni fit-toroq, bħal tiswija ta’ ħitan tas-sejjieħ, ħasil tat-toroq, bdil ta’ madwar 800 tabella u aktar minn 330 intervent ta’ tiswijiet ta’ bankini, fost ħafna oħrajn.
Il-Ministru responsabbli mill-Indafa Pubblika, Clayton Bartolo, stqarr ma’ ONE News li l-Gvern qed iwettaq diversi miżuri addizzjonali biex tkompli titjieb l-indafa u manutenzjoni kemm f’żoni arterjali kif ukoll f’żoni residenzjali u stqarr kif din il-ħidma kollha, tkun aktar ta’ frott jekk ikun hemm il-koperazjoni min-naħa tal-pubbliku.
Qal, “Filwaqt li nirrikonoxxu li diġà għamilna ħafna xogħol, madankollu aħna nħarsu ’l quddiem ukoll biex, fil-ġimgħat u x-xhur li ġejjin, inkomplu nżidu l-impenn tagħna ħalli naraw li l-indafa pubblika madwar il-pajjiż kollu tkun ta’ prijorità u għalhekk li, flimkien mal-investiment li ħabbarna ftit tal-ġimgħat ilu, issa qegħdin immorru pass oltre minn hekk biex naraw li nkomplu nkattru dejjem iżjed il-ħidma tagħna, għax irridu naraw li pajjiżna jkun verament iżjed organizzat u pajjiż ħafna isbaħ milli kellna fis-snin li għaddew.”
Is-Segretarju Parlamentari fl-istess Ministeru, Glenn Bedingfield, stqarr li minn Ottubru ’l hawn, mindu waslu diversi makkinarji ġodda, fosthom robots, bdew jiġu introdotti fit-toroq tagħna mill-bidu ta’ din is-sena u, permezz tagħhom, se jibbenefikaw madwar 24 lokalità u se jkun hemm aktar frekwenzi ta’ tindif li għandhom iservu ta’ għajnuna għall-ħaddiema tagħna.
Kompla jisħaq kif pajjiżna hu tagħna u rridu nieħdu ħsiebu għalina l-Maltin, għal dawk kollha li jgħixu hawnhekk u għal dawk li jiġu jżuruna. Qal kif aħna jixirqilna li jkollna ambjent aħjar fejn ngħixu.
Stqarr, “L-idea ta’ dan il-programm mhux biss ta’ tindif, imma jmur olte minn hekk, anke d-diviżjoni li jiena responsabbli tagħha politikament hi responsabbli kemm mit-tindif, imma anke mill-manutenzjoni, u flimkien qed nikkordinaw pjan ta’ xogħol għax-xhur li ġejjin flimkien ma’ għadd ta’ entitajiet oħrajn biex pajjiżna jkun isbaħ u aħjar illum u anke għada.”
Din il-Kampanja Nazzjonali għat-Tindif u l-Manutenzjoni, ikkordinata mill-Ministeru għat-Turiżmu, flimkien mad-Diviżjoni għat-Tindif u l-Manutenzjoni, qegħda ssir b’ħidma ma’ sitt entitajiet governattivi oħrajn, fosthom il-Public Works Department, l-Aġenzija għar-Riġenerazzjoni ta’ Żoni Turistiċi, l-Enemalta, il-Water Services Corporation, Infrastructure Malta u Transport Malta.
