L-irwol tal-midja soċjali llum il-ġurnata sar importanti ħafna għal bosta negozji u kif ukoll personaġġi sabiex jirriklamaw lilhom infushom jew forsi xi prodott li jaħsbu jimxi tajjeb mas-segwaċi tagħhom. Iżda dan mhux biss hekk kif il-meravilja li toffri Malta hi kważi biżżejjed biex tikkonvinċi lil dawk li kellhom xi ħsieb li jżuru Malta.
Iżda għalkemm forsi dak ir-ritratt sabiħ fuq il-midja soċjali jinżel għasel ma’ bosta fanatiċi tal-ivjaġġar, huma dawk il-profili li għandhom l-eluf ta’ segwaċi li jgħinu biex ixerrdu l-kelma dwar is-sbuħija li toffri Malta.
Filfatt, pjattaforma bħal Instagram hi waħda fost l-aktar mezzi favoriti maż-żgħażagħ fejn numru ta’ personaġġi li saħansitra għandhom ‘il fuq minn 90,000 persuna jsegwihom ipoġġu ritratti sbieħ ta’ dak li toffri Malta u jiftaħru dwar il-jiem sajfin li qed iqattgħu fuq il-gżejjer Maltin.
Illum il-ġurnata Instagram jintuża ukoll minn dawk li jivvjaġġaw billi jfittxu l-pajjiż bil-# quddiem il-kelma, pereżempju #malta, biex jieħdu idea ta’ x’joffri l-pajjiż u jekk hux post li jridu jżuru. Hekk kif wieħed ifittex lil Malta, dlonk jitilgħu ritratti mill-isbaħ tal-gżejjer Maltin li poġġew persuni b’eluf ta’ segwaċi fuq il-profil tagħhom. Ritratti li saħansitra ntgħoġbu mill-eluf.
Għalkemm forsi din il-pjattaforma ma tilħaqx lil kulħadd, hi mezz ideali u faċli li żgur tgħin tikkonvinċi lil bosta fejn għandhom imorru għall-btala li jmiss.
Ritratti: @larenswells, @callicles
