Illejla l-Partit Laburista sellem il-memorja ta’ Karin Grech, lejliet is-sebgħa u erbgħin anniversarju mill-qtil makabru tagħha.
Il-Prim Ministru Robert Abela akkumpanjat mill-amministrazzjoni u t-tmexxija tal-Partit Laburista u anke deputati Laburisti poġġew fjuri fuq il-mafkar tagħha f’San Ġwann.
Il-Prim Ministru Robert Abela sostna li din iċ-ċerimonja annwali biswit il-monument ta’ Karin Grech issir biex tfakkar il-memorja għażiża ta’ din it-tfajla li nqatlet minħabba l-mibegħda.
Saħaq li l-mibegħda m’għandha tidħol qatt f’pajjiżna għax tkisser is-serenità, il-prosperità u l-paċi u aħna bħala pajjiż għandna dejjem nibqgħu maqgħudin favur il-paċi u kontra l-firda.
Żied jgħid li għandna naħdmu fuq il-valuri tal-paċi u r-rispett biex inkomplu nsaħħu s-soċjetà tagħna.
