• Seba’ pajjiżi f’erbat ijiem
• Laqgħat ma’ mexxejja biex ikunu diskussi l-prijoritajiet
• Żjara fl-iktar bliet kapitali importanti
Għada l-Prim Ministru, Joseph Muscat, jibda vjaġġ marbut mal-Presidenza tal-Kunsill tal-Unjoni Ewropea.
Dan proprju ġimgħa wara li pajjiżna nieda l-identità viżwali tal-Presidenza u ħabbar ukoll il-prijoritajiet b’mod uffiċjali. Issa li baqa’ biss ftit iktar minn xahar għall-Presidenza, it-tħejjijiet isiru iktar intensivi u l-laqgħat politiċi jibdew ma jaqtgħu xejn saħansitra fuq livell ta’ mexxejja.
Huwa għalhekk li minn għada l-Prim Ministru jibda jżur seba’ pajjiżi f’erbat ijiem fejn kollox jibda bi żjara f’Pariġi fejn se jiltaqa’ mal-President Franċiż Francoise Hollande. Il-Prim Ministru se jkun qed jiltaqa’ wkoll mal-Kanċillier tal-Ġermanja, Angela Merkel, biex b’hekk se jkun mar fi tnejn mill-iktar bliet kapitali influwenti fl-Ewropa u żewġ pajjiżi li s-sena d-dieħla se jkunu qed jaffaċċjaw elezzjoni li mhux biss se timpatta l-pajjiż partikolari iżda anke fuq il-ġejjieni tal-Unjoni Ewropea.
Fl-Irlanda, il-Prim Ministru se jiltaqa’ mal-Prim Ministru Enda Kenny, li ilu jmexxi l-pajjiż mill-2011. Joseph Muscat għandu wkoll laqgħa skedata l-Estonja, fejn il-Prim Ministru Taavi Roivas tilef vot ta’ fiduċja iktar kmieni dan ix-xahar bil-president tal-pajjiż jitlob lill-Partit taċ-Ċentru mmexxi minn Juri Ratas imexxi l-gvern. Biex imbagħad fil-Polonja se ssir laqgħa bejn Joseph Muscat u l-Prim Ministru Beata Syzdlo u fid-Danimarka, Muscat ikollu taħdidiet mal-Prim Ministru Lars Lokke Rasmussen. Fl-Ungerija se ssir laqgħa mal-President Viktor Orbán.
Kull laqgħa minn dawn ikollha sfond differenti. Skont il-pajjiż u r-realtajiet li qiegħed jiffaċċja bħalissa, bix-xogħol tal-Prim Ministru jkun dak li jiddiskuti l-prijoritajiet tal-Presidenza Maltija u jiġbed lejhom iktar appoġġ. Dan biex meta l-Presidenza tibda fi ftit ġimgħat tassew tkun waħda effettiva u li tħalli riżultati konkreti fil-qafas li llum jippermetti l-mod kif taħdem l-Unjoni Ewropea. Fost it-temi diskussi se jkun hemm ukoll il-ġejjieni tal-Unjoni Ewropea anke fid-dawl tas-summit ta’ Bratislava li sar ftit tal-ġimgat ilu.
B’summit ieħor se jsegwi f’pajjiżna fi Frar li ġej li wkoll mistenni jkun tema ewlenija. L-ekonomija Ewropea u l-kunflitti fis-Sirja u l-Libja jkunu wkoll fuq l-aġenda. Naturalment hemm ukoll Brexit, anke fid-dawl li r-Renju Unit se jkun qiegħed jinvoka artiklu ħamsin tat-Trattat tal-Unjoni Ewropea, biex jimplimenta r-rieda tal-poplu f’referendum, proprju f’nofs il-Presidenza Maltija. Filwaqt li ladarba madwar il-mejda jkollok żewġ mexxejja ta’ żewġ pajjiżi differenti ma tonqosx ir-referenza għar-relazzjonijiet bilaterali bejn iż-żewġ naħat. Dawn il-laqgħat isegwu wkoll laqgħat mal-Prim Ministri tal-Olanda u s-Slovakkja iktar kmieni dan ix-xahar f’pajjiżna u laqgħat mal-ogħla uffiċjali tal-Unjoni Ewropea fi Brussell.
Fil-fatt, fil-kapitali Ewropea, Muscat iltaqa’ mal-President tal-Parlament Ewropew, Martin Schulz, mal-President tal-Kunsill tal-Unjoni Ewropea, Donald Tusk u mal-President tal-Kummissjoni Ewropea Jean Claude Juncker. Fil-laqgħa ma’ Juncker, il-Prim Ministru kellu miegħu lill-Kabinett tal-Ministri li flimkien mal-Kulleġġ tal-Kummissarji Ewropej iddiskutew il-Presidenza Maltija b’Jean Claude Juncker jiddikjara li Malta hija mħejjija sew u li huwa konvint li l-Presidenza Maltija se tkun suċċess. “Malta pajjiż żgħir b’ambizzjonijiet kbar,” qal il-President tal-Kummissjoni Ewropea.
Il-messaġġ tal-Prim Ministru Malti dwar il-presidenza huwa wkoll wieħed ċar. “Il-Presidenza hi dik li hi. Tul is-snin ingħatat dimensjoni differenti u aħna se nżommu max-xogħol tagħna. Irridu nagħmlu x-xogħol tagħna b’mod tajjeb. Fejn irridu li l-affarijiet isiru u nassiguraw li l-Unjoni Ewropea ma tiqafx, iżda tkompli tipprogressa u anke nagħtu l-kontribut tagħna kull fejn meħtieġ,” qal il-Prim Ministru.
“Il-vantaġġ tagħna f’dan il-mument li aħna poplu li għalih huwa naturali li jibni l-pontijiet. Nies li nfittxu l-kompromess biex nuru li l-ġejjieni huwa wieħed tajjeb,” qal il-Prim Ministru fi Brussell li fisser kif naturalment se jkun hemm kriżijiet. Dawk li nafu bihom u dawk li jinqalgħu minn żmien għal żmien. Fuq kollox il-Prim Ministru ddikjara li jrid li l-Presidenza tkun waħda relevanti għan-nies. “Irridu mhux biss nisimgħu lin-nies, iżda naġixxu dwarhom,” iddikjara l-Prim Ministru Malti lejlet li Malta tippresjedi l-Kunsill tal-Unjoni Ewropea għall-ewwel darba.
