Ġiet inawgurata faċilità sportiva bi grawnd ġdid tal-futbol fil-Mediterranean College of Sport.
Waqt iż-żjara li għamel f’dan il-kulleġġ f’Birkirkara, il-Prim Ministru Robert Abela kellu ċ-ċans iżur lill-istudenti fil-klassijiet tas-Sekondarja flimkien mal-laboratorji xjentifiċi marbuta mal-qasam sportiv. Hemm kellu ċ-ċans jitkellem ukoll mal-ħaddiema fid-dipartimenti differenti.
Ġie spjegat li b’kollox Vassallo Group, b’investiment ta’ €15-il miljun, ħoloq mas-7,000 metru kwadru ta’ spazji mmirati għall-isport. Ġew rinnovati wkoll 2,000 metru kwadru ta’ spazji, inkluż pixxina, grawnds tal-futbol, gym tal-ġinnastika u sports performance centre.
Dan il-kulleġġ fetaħ fit-30 ta’ Settembru li għadda u llum għandu 95 student.
Fil-fatt ma’ ONE News, iċ-Chairman ta’ Mediterranean College of Sport, Pio Vassallo, spjega li, fis-snin li ġejjin, il-kulleġġ mistenni jilqa’ fih mal-400 student atleta u ħabbar kif hemm pjani għal skola Primarja wkoll.
“Minkejja li ilna biss ftit xhur li ftaħna, ir-rispons tal-pubbliku Malti sportiv intlaqa’ tajjeb ħafna. L-istudenti tagħna huma kuntenti ħafna b’dak li qegħdin nagħmlu u diġà qegħdin naraw l-iżvilupp tagħhom jagħti l-frott. Fil-fatt ir-rispons tant kien tajjeb li ddeċidejna li, is-sena d-dieħla, se niftħu l-bibien għal skola primarja fejn it-tfal minn età żgħira nkunu qegħdin nesponuhom għall-esperjenza sportiva u jkunu qed iduqu numru ta’ dixxiplini sportivi.”
Pio Vassallo, Mediterranean College of Sport
Fiċ-ċerimonja fejn fiha ġie inawgurat grawnd tal-futbol ġdid, li ssemma għal Fr Hillary Tagliaferro wara l-kontribut kbir li ta lill-futbol Malti speċjalment fost iż-żgħażagħ, il-Prim Ministru Robert Abela sostna li rridu nibqgħu nibagħtu l-messaġġ li l-isport għandu jkun parti integrali mill-mod kif ngħixu.
“Lil hinn mill-faċilità fiżika, li hi tal-aqwa kwalità, jiġfieri dan hu investiment f’kull dixxiplina sportiva tista’ tgħid, kollox tal-ogħla livell, ta’ kalibru internazzjonali, imma lil hinn minn hekk hu proġett li jiġbor fih filosofija ta’ fejn jien nemmen li għandna nieħdu lil dan il-pajjiż ’il quddiem. L-importanza tal-attività fiżika, l-importanza ta’ nutrizzjoni tajba, il-ħsieb li tista’ tgħaqqad l-akkademja, is-suġġetti akkademiċi, jekk hux qed nitkellmu dwar suġġetti STEM, il-lingwi, flimkien mal-ħsieb li mill-isports jista’ jkollok karriera.”
Il-Prim Ministru Robert Abela
