Dak diskuss fis-Summit tal-Komunità Politika Ewropea, li sar fil-belt ta’ Granada, fi Spanja, matul il-jum tal-Ħamis kompla fuq dak li ġie diskuss fil-MED 9, f’pajjiżna.
Sostna dan il-Prim Ministru Robert Abela f’kummenti mal-midja wara li ntemm dan is-Summit.
Qal, “It-temi li ddiskutejna komplew jibnu fuq dak li ddiskutejna f’Malta, il-ġimgħa li għaddiet, fil-kuntest tal-MED 9. Primarjament iddiskutejna l-bidla fil-klima, kif tgħaqqad magħha l-enerġija, b’enfasi fl-enerġija rinnovabbli.”
Hawnhekk, il-Prim Ministru Malti attenda fost sebgħa u erbgħin mexxej ta’ pajjiżi fil-kontinent Ewropew.
L-ewwel laqgħa tal-Komunità Politika Ewropea kienet saret fir-Repubblika Ċeka sena ilu u t-tieni laqgħa saret f’Mejju li għadda fil-Moldova.
Dan is-summit għandu l-għan li jkompli jsaħħaħ id-djalogu u l-koperazzjoni bejn is-27 stat membru fl-Unjoni Ewropea u pajjiżi oħrajn Ewropej li mhumiex, waqt li jkompli jimmira li tissaħħaħ is-sigurtà u l-istabilità tal-kontinent kollu, mhux l-inqas illum il-ġurnata waqt gwerra fil-Lvant Ewropew.
Dr Abela sostna li dwar is-suġġett tal-enerġija, pajjiżna qed jegħleb din l-isfida billi se jkun qed jagħmel turbini tar-riħ fuq il-baħar, li jipproduċu b’enerġija rinnovabbli.
Il-Prim Ministru tkellem ukoll dwar il-ftehim li sar mal-Libja biex ikun hemm konnessjoni ta’ enerġija rinnovabbli bejn pajjiżna u dan il-pajjiż ġar tagħna. Ma’ dan hemm ukoll it-tieni interkonnessjoni mal-Italja, li se ssir sal-2026.
Mal-mexxejja Ewropej, il-Prim Ministru Malti tenna dwar il-miżura favur il-familji u n-negozji, fejn il-prezzijiet tal-enerġija nżammu stabbli u m’għolewx – l-uniku pajjiż fl-Ewropa.
Il-midja internazzjonali rrapportat li fuq l-aġenda kien hemm ukoll il-migrazzjoni, suġġett li kien enfasizzat ħafna fil-laqgħa għolja tal-mexxejja tal-pajjiżi tal-Mediterran tal-Unjoni Ewropea, li saret fil-Berġa ta’ Kastilja ġimgħa ilu.
Fost dawk l-aktar voċiferi dwar dan is-suġġett fi Spanja hemm il-Prim Ministru Taljan, Giorgia Meloni, fl-istess ton Ii l-mexxejja tal-MED 9 qablu f’Malta, jiġifieri li jkun hemm rispons immedjat mill-Unjoni Ewropea għall-isfidi tal-wasliet fil-Mediterran.
Preżenti għas-Summit illum kien hemm ukoll il-President Ukren Volodymr Zelensky, li tenna li jekk ir-Russja tirbaħ l-Ukrajna, din tispiċċa tattakka pajjiżi oħrajn Ewropej, flimkien mal-President tal-Kummissjoni Ewropea, Ursula von der Leyen, u l-President tal-Kunsill Ewropew, Charles Michel.
Sadanittant, il-Ġimgħa, fi Granada se ssir il-laqgħa informali bejn il-mexxejja tal-Unjoni Ewropea, li biex jittrattaw l-isfidi li għandhom quddiemhom, inkluża l-migrazzjoni, kif ukoll iż-żieda ta’ pajjiżi ġodda fl-Unjoni Ewropea u l-qalba ekoloġika u diġitali.
Dan is-summit, fejn qed jattendi l-Prim Ministru Malti, se jkun qed isir qabel il-laqgħat formali bejn il-mexxejja aktar tard dan ix-xahar u f’Diċembru li ġej.
