“Iċ-Ċentru tas-Saħħa ta’ Ħal Qormi hu turija kif is-servizzi tas-saħħa qegħdin inkomplu nqarrbuhom lejn il-familji. Bl-immodernizzar ta’ dawn iċ-Ċentri tas-Saħħa u bil-ftuħ ta’ community clinics madwar il-pajjiż, qegħdin nagħmlu rivoluzzjoni fil-qasam tal-kura primarja”.
Qal dan il-Prim Ministru Robert Abela waqt l-inawgurazzjoni tal-immodernizzar sħiħ taċ-Ċentru tas-Saħħa ta’ Ħal Qormi, fejn kien akkumpanjat mill-Ministru għas-Saħħa u l-Anzjanità Attiva, Jo Etienne Abela.
Dan l-investiment kien jammonta għal madwar tnejn punt tmin miljun ewro (€2.8 miljun), li se jibda joffri aktar servizzi liċ-ċittadini tal-lokal u r-reġjun.
Il-Prim Ministru elenka wkoll aktar investiment li sar fir-riżorsa primarja, hekk kif il-ħaddiema se jkollhom il-faċilità li jingħataw taħriġ kontinwu. Qal li dan se jkun qed ifisser investiment favur komunitajiet aktar b’saħħithom.
Ġie spjegat li, f’dan iċ-ċentru mtejjeb, mhux biss se tingħata kura primarja, iżda wkoll servizzi speċifiċi, fosthom b’rabta mal-kura tad-dijabete, magna tal-Xray ta’ kwalità ogħla u titjib fl-apparat mediku l-ieħor użat.
Minbarra hekk, dan iċ-Ċentru tas-Saħħa sar ukoll iżjed aċċessibli, bl-installazjoni ta’ lift u stairlift aktar effiċjenti u siguri.
Qal, “Meta nitħaddtu dwar komunitajiet b’saħħithom, irridu nitkellmu dwar komunitajiet, li s-servizzi jkunu aċċessibbli għan-nies. Hawnhekk qed naraw kura għas-servizzi speċjalizzati, bħall-kura għad-dijabete, servizzi tas-saħħa mentali, li huma verament viċin il-komunità … u dak li rrid nara fil-komunitajiet tagħna. Komunitajiet isbaħ, aktar nodfa, b’servizzi mediċi qrib ir-residenti, servizzi ta’ sigurtà li huma b’saħħithom ukoll, servizzi t’edukazzjoni li huma b’saħħithom, faċilitajiet sportivi wkoll.”
Dr Abela, ħabbar li l-Gvern se jkompli jinvesti fis-settur tas-saħħa u fir-riżorsa umana fiż-żmien li ġej, filwaqt li spjega kif il-ħaddiema fissru li dan l-investiment se jwassal għall-kura aħjar tal-pazjenti.
Qal, “Tant professjonisti, jaħdmu hawnhekk b’dedikazzjoni u li llum qalulna li issa, filwaqt li qabel konna qed nagħtu dak is-servizz b’tant dedikazzjoni, imma minn premises, li kienu jeħtieġu ftit tax-xogħol sew fihom, issa għandna binja state-of-the-art, li se tippermettilna nagħtu is-servizz tagħna b’mod aħjar u lill-pazjent tagħtih il-fiduċja li se jirċievi servizz aħjar.”
Il-Prim Ministru qal li dan is-settur inbidel minn wieħed b’lista limitata ta’ mediċini għal żieda fil-mediċini fuq il-formularju tal-Gvern, minn ċentri tas-saħħa mitluqa għal dawk state-of-the-art.
Minn servizzi li stajt tirċievi biss mill-Isptar Mater Dei għal servizzi tefgħa ta’ ġebla ’l bogħod minn darek. Community Clinics ġodda madwar il-pajjiż u servizzi ġodda fil-komunità marbuta mas-saħħa mentali.
Il-Prim Ministru kkonkluda li dan kollu qed isir għax pajjiżna hu b’saħħtu u kapaċi jsostni l-investiment.
Min-naħa tiegħu, il-Ministru Abela qal kif, permezz tar-rinnovar li sar fiċ-Ċentru tas-Saħħa f’Ħal Qormi, issa se jkunu qed jiġu offruti xejn inqas minn 23 servizz tal-ogħla livell għan-nies li jgħixu f’Ħal Qormi u l-madwar.
Qal, “Nixtiequ li l-kura tas-saħħa nkomplu niddemokratizzawha, jiġifieri, kif qal il-Prim Ministru, inwassluha fil-komunitajiet. Irridu li dak ikun il-pilastru tas-saħħa tagħna, li jingħaqad imbagħad ma’ kullana ta’ servizzi oħrajn, sekondarji u terzjarji, għax l-għan tagħna hu li ntejbu l-kwalità tal-ħajja tal-persuni, u kif qal il-Prim Ministru, ta’ min jieħu ħsiebhom.”
Il-programm ta’ modernizzazzjoni u titjib fil-kura tas-saħħa primarja u l-kliniċi fil-komunità hu appoġġjat mill-għotja ta’ €10 miljun mill-Fond Soċjali għall-Iżvilupp Nazzjonali, l-NDSF.
Preżenti għall-inawgurazzjoni kien hemm is-Sindku ta’ Ħal Qormi, Josef Masini Vento, u l-Kap Eżekuttiv tal-Kura Primarja, Roseanne Camilleri.
