F’laqgħa ta’ qabel il-Baġit mal-UĦM Voice of the Workers fil-Berġa ta’ Kastilja, il-Prim Ministru Robert Abela ħabbar li, fl-aħħar jiem, il-Kabinett approva qafas leġiżlattiv biex jirregola dak magħruf bħala platform work.
Dettalji dwar sett ta’ regoli ġodda aktar robusti se jingħataw mill-Gvern fil-jiem li ġejjin iżda, fil-laqgħa mal-UĦM, il-Prim Ministru spjega l-prinċipji ta’ dan il-qafas fosthom li jirregolaw il-kuntratt tax-xogħol u li s-salarju ma jistax ikun inqas mill-paga minima, fost drittijiet oħra bħal sahra u liv tal-mard.
F’dan il-kuntest il-Prim Ministru Robert Abela saħaq fuq il-ħtieġa tal-kuraġġ fit-teħid tad-deċiżjonijiet wara stħarriġ organizzat u strutturat mill-Awtoritajiet, fil-każ tal-platform work, mid-Dipartiment għar-Relazzjonijiet Industrijali u tal-Impjieg.
Fid-diskussjonijiet mal-unjin qabel il-Baġit, Dr Abela saħaq fuq il-ħtieġa li pajjiżna jibqa’ jattira l-investiment u hawn talab għall-kollaborazzjoni tas-sħab soċjali biex nibqgħu niġbdu investiment lejn Malta li bih nassiguraw dħul b’saħħtu għall-Gvern u, b’dak id-dħul, il-Gvern jibqa’ jsostni l-għajnuna li qed jagħti quddiem sfidi straordinarji.
“L-ebda pajjiż mhu jgħin daqskemm qed jgħin il-Gvern Malti lin-nies, fosthom fil-qasam tal-enerġija u fl-importazzjoni taċ-ċereali”, qal il-Prim Ministru Robert Abela hu u jisħaq li l-Baġit li jmiss irid ikun wieħed ta’ sostenibbiltà u ta’ stabbiltà.
Dr Abela sostna wkoll fuq l-importanza tad-djalogu soċjali u fisser kif il-Baġit li jmiss se jkun l-ewwel wieħed minn ħamsa biex il-Gvern jimplimenta l-manifest elettorali li għandu mandat fuqu min-nies.
Min-naħa tiegħu, il-Kap Eżekuttiv tal-UĦM, Josef Vella, għadda numru ta’ proposti lill-Gvern u saħaq fuq għan komuni għall-Gvern u l-unjins, dik tat-titjib fil-kundizzjonijiet tax-xogħol tal-ħaddiema.
Hawn laqa’ b’sodisfazzjon dak li kien għadu kif ħabbar il-Prim Ministru fuq il-platform workers, u qal li l-ħaddiema f’dan is-settur qed jagħtu servizz li ndara u baqa’ wieħed kostanti anki wara l-pandemija.
Vella spjega wkoll li l-kumpens għall-għoli tal-ħajja (il-COLA) m’għandux jiġi trattat bħala parti minn żieda fil-pagi li l-unjins jinnegozjaw fil-ftehimiet kollettivi.
Għal din il-laqgħa kien hemm preżenti wkoll id-Deputat Prim Ministru, Chris Fearne, il-Ministri Clyde Caruana u Michael Falzon, is-Segretarju Parlamentari Andy Ellul, id-Deputat tal-Gvern Amanda Spiteri Grech, u l-Kap tas-Segretarjat fl-Uffiċċju tal-Prim Ministru, Glenn Micallef.
