Il-€45 miljun f’vouchers mill-Gvern jistgħu jibdew jintefqu mis-7 ta’ Ġunju.
Dan ħabbru l-Prim Ministru Robert Abela waqt intervista li kellu l-Ħadd filgħodu, fejn fost l-oħrajn stqarr kif it-tilqim kontra l-COVID-19 u l-kumplament ta’ miżuri ta’ trażżin jibqgħu kruċjali.
Hawn qal li l-Gvern se jkompli jagħti l-għajnuna li hemm bżonn biex il-pajjż jgħaddi minn proċess ta’ rkupru b’saħħtu.
Il-Prim Ministru Robert Abela qal, “Fil-jiem li ġejjin ser inkunu qed inħabbru kif ser ikunu qed jitqassmu l-vouchers iżda l-għan, it-target jibqa’ li mis-7 ta’ Ġunju dawk il-vouchers, €45 miljun oħra f’vouchers, it-tieni skema ta’ dawn il-vouchers ser ikunu jistgħu jiġu utilizzati min-nies.”
Qal kif illum li qegħdin fil-proċess li pajjiżna jirritorna lejn in-normalità, u l-previżjoni li pajjiżna jkollu 50,000 persuna qiegħda ma mmaterjalizzatx. Il-Prim Ministru fakkar li dan kien frott id-deċiżjoni li l-Gvern ma jimxix f’politika ta’ awsterità.
Il-Prim Ministru sostna: “Ara xi problema enormi kien ikollna bħala pajjiż kieku erbatax-il xahar ilu ma ħadniex deċiżjoni strateġika li flok nimxu b’politika ta’ awsterità kif għamlu ta’ qabilna ħdax, tnax-il sena ilu f’kriżi ekonomika, mhux ta’ saħħa u ekonomika, fi kriżi ekonomika biss għaxar darbiet iċken minn dik tal-lum, li mxew b’politika ta’ awsterità. Aħna minflok investejna bis-saħħa fin-nies u l-frott ta’ dik id-deċiżjoni qed narawh illum li għandna livell ta’ qgħad li huwa at pre-pandemic levels, jiġifieri kif kien qabel Marzu tas-sena li għaddiet.”
Dwar il-laqgħa tal-kabinett fl-Inspire it-Tnejn li għadda, il-Prim Ministru stqarr kif it-tema soċjali li tant għandu għal qalbu dan il-Gvern hija li jkun preżenti u viċin in-nies. Fakkar li l-Gvern irid jara l-iktar ammont ta’ persuni diżabilità fid-dinja tax-xogħol anke permezz tal-istrateġija li qed jimplimenta.
Qal kif iż-żieda fl-investiment fil-pensjonijiet saħansitra tmur lil hinn mill-wegħda elettorali, għaliex dan l-investiment imur mal-prinċipji tal-Partit Laburista li jemmen f’ruħ soċjali b’saħħitha.
Dwar ir-riforma fil-kirjiet ta’ qabel l-1995, il-Prim Ministru nnota kif is-soluzzjoni għall-Kap tal-Oppożizzjoni Bernard Grech kienet li jħalli anzjani jinħarġu minn djarhom u jmorru fi djar tal-anzjani. Filwaqt li nnota l-investimenti pożittivi li qed isiru fid-djar tal-anzjani, Dr Abela qal li anzjan li għadu jiflaħ jgħix fil-komunità m’għandux ikun sfurzat imur f’dar residenzjali kontra x-xewqa tiegħu minħabba s-sitwazzjoni tal-kirjiet antiki.
Il-Mexxej Laburista qal ukoll li l-Gvern qed iħares lejn investiment li joħloq xogħlijiet ta’ kwalità u li jgħolli l-kwalitá ta’ ħajja f’Għawdex. Qal kif l-ewwel ta’ Ġunju ser ikun ‘Game Changer’ għal Għawdex bl-introduzzjoni tal-Fast Ferry bejn il-Belt Kapitali ta’ pajjiżna u l-gżira tat-tliet għoljiet.
Dr Abela tenna: “Dan huwa l-mod ta’ kif jaħdem il-Gvern. Li inti, ma ġejniex bi problema, kif ser insolvu l-problema tal-mollijiet u qgħadna nikkonfondu biss. Poġġejna darba, darbtejn, tlieta u tlaqna u fl-ewwel ta’ Ġunju ser ikollna dan is-servizz li ser ikun qiegħed jopera imma mhux biss għat-turiżmu. Ser ikun qiegħed operattiv għal tant u tant Għawdxin li l-mod tagħhom ta’ kif jagħmlu t-traġitt lejn il-gżira, lejn Malta, ser ikun faċilitat bil-kbir.”
Dr Abela qal li l-Gvern irid jipproteġi l-karatteristiċi ta’ Għawdex u jkompli jżid l-investiment, fosthom ukoll biex Għawdex isir ‘Carbon neutral’.
Dwar l-isport il-Prim Ministru Robert Abela stqarr kif dan il-Gvern qed jara kif minn dan il-qasam il-Maltin u l-Għawdxin ikunu jistgħu jagħmlu karriera professjonali.
Huwa qal, “L-isport huwa prijorità ewlenija oħra għal dan il-Gvern u l-isport f’Malta, l-isport f’Għawdex, u jien nemmen li mill-isport dan il-Gvern għandu joħloq karriera. Li mill-isport għandek min jarah b’mod rikreattiv iżda mbagħad min jarah minn aspett ta’ żvilupp ta’ karriera. Li inti tkun tista’ fuq livell professjonali mid-dixxiplina li tkun tant għal qalbek toħloq professjoni li minnha tista’ taħdem, toħloq għajxien għalik innifsek.”
