F’kollegament telefoniku l-Hadd filgħodu l-Prim Ministru Robert Abela stqarr kif il-Gvern irid ikompli fuq il-kisbiet li saru fl-aħħar snin filwaqt li jkompli jġib bidliet pożittivi f’pajjiżna.
Il-Prim Ministru stqarr kif fil-qasam tal-akkomodazzjoni qed tingħata lura d-dinjità lil persuni permezz ta’ saqaf fuq rashom.
“L-istatistika tgħinna nifhmu xi progress għamilna. Fl-2017 kien hemm tliet elef, madwar 3,500 persuna fil-lista tan-nies jitolbu l-housing għand l-awtoritá tad-djar, taf kemm naqset illum? Bi 42% fil-mija. Illum għandna 1,900 persuna. Progress illi seħħ saħansitra qabel ma jibdew jiġu allokati d-djar il-ġodda tal-akkomodazzjoni soċjali.”
Il-biljun ewro f’nefqa soċjali issarraf f’iktar nies li ġew indipendenti mill-għajnuniet tal-istat.
Dr Abela qal kif dan il-Gvern naqqas il-faqar bi pjan għaliex għaraf iħaddem l-ekonomija b’ruħ soċjali. Semma kif sar investiment sabiex anke mijiet ta’ familji jkollhom id-dar tagħhom iżjed aċċessibli filwaqt li oħrajn minn fuq il-lista ta’ stennija sabiex ikollhom akkomodazzjoni spiċċaw sidien ta’ darhom.
Filwaqt li r-riżultat ta’ A+ mogħti minn Fitch Ratings jimliek bil-kuraġġ il-Prim Ministru qal li l-Gvern irid jibqa’ ffukat fuq dak li bħala poplu irridu niksbu.
Il-Prim Ministru Robert Abela qal kif dan ir-riżultat juri li pajjiżna ser ikun qed jitlaq minn bażi tajba sabiex issa jara fejn irid jasal fl-għaxar snin li jmiss, dan kemm fil-qasam ekonomiku iżda wkoll fil-qasam ambjentali.
Il-Prim Ministru nnota kif dwar il-ħolqien tal-ġid u l-impjiegi f’pajjiżna, ilħaqna l-medja ewropea, iżda fadal ħafna x’isir.
“Imma issa x’irridu, rridu nibqgħu mal-medja, u ngħidu waqafna, għamilna biżżejjed u nistrieħu? Le, l-għaxar snin li ġejjin, id-deċenju li jmiss irid ikun dak li joħodna biex insiru ċ-ċentru ta’ eċċellenza.”
B’kuntrast ma dawn il-kisbiet u s-sentiment tal-poplu, nnota kif waqt l-konferenza tal-President ta’ Malta li ġiet fi tmiemha l-Ġimgħa, spikkat in-negattivitá ta’ Bernard Grech li imbgħad sarrfet f’nuqqas ta’ fiduċja fl-oppożizzjoni.
Filwaqt li Bernard Grech qal li dan il-Gvern berbaq il-flus, Fitch qed tgħid kompletament il-kontra. Il-Prim Ministru qal kif huwa għadu ġej minn Kunsill Ewropew b’mexxejja li faħru lil Malta wara li kisber l-immunità kontra l-Coronavirus, u f’Malta stess issib kap tal-oppożizzjoni li m’għandu l-ebda kelma pożittiva dwar pajjiżna.
“In-nies segwewh, rawh isaqsini d-domandi, imqar kumment pożittiv wieħed dwar dak li rnexxielna nagħmlu flimkien f’dawn l-aħħar xhur ma kellux x’jgħid. Jiena dil-kelma xtaqtha, kelma pożittiva mqar waħda, mhux għall-Gvern, lanqas għalija, iżda għan-nies. Għal dawk l-eluf kollha li taw ħajjithom f’dawn l-aħħar xhur, taw kull farka enerġija li kellhom biex pajjiżna wasal fejn wasal illum.”
Il-Prim Ministru temm jgħid kif filwaqt li Bernard Grech qal li Gvern Laburista ftit fadallu fil-Gvern, dik id-deċiżjoni hija biss f’idejn in-nies, iżda sakemm dan il-Gvern ikompli jgawdi l-fiduċja tal-poplu il-ħidma ser tkompli favur il-Maltin u l-Għawdxin.
