F’intervista fuq ONE Radio Joseph Muscat tkellem dwar il-ħtieġa li l-poplu jkun magħqud. Mhux biex ma jkunx hemm il-kritika, iżda biex wieħed jagħraf jgħid il-verità. Meta kien qed jitkellem dwar il-qtil ta’ Daphne Caruana Galizia li seħħ nhar it-Tnejn li għadda, il-Prim Ministru tenna l-impenn tal-gvern li ssir ġustizzja.
“Dan huwa każ li minbarra li nqatlet persuna, inqatlet ukoll ġurnalista. Saret ukoll ħsara lir-reputazzjoni tal-pajjiż u rridu naraw li r-reazzjoni tagħna tkun mhux biss waħda ta’ dinjità, iżda li turi li dan il-pajjiż mhux se jaċċetta fatt bħal dan,” qal il-Prim Ministru li fisser kif il-Gvern Malti mhux se jħalli dak li seħħ għaddej qisu ma ġara xejn.
Tkellem dwar ir-‘reward’ ta’ miljun ewro lil min iwassal għall-ġustizzja. “Is-sinjal li tajna huwa sinjal li ntlaqa’ anke mill-mezzi tax-xandir internazzjonali,” qal Joseph Muscat. Irrefera kif huwa ovvju li jkun hemm min jista’ jkun li għandu interess mod ieħor fuq pajjiżna u kien hawn li stqarr: “Huwa d-dover tagħna bħala Maltin li nitkellmu mal-barranin u li ngħidu l-verità.”
Fisser kif din il-ġimgħa, meta kien fi Brussell, tkellem ukoll ma’ mexxejja ta’ pajjiżi tal-Unjoni Ewropea u kif dawn apprezzaw li kien hu li tahom spjega ta’ x’seħħ.
Mistoqsiji dwar kummenti tal-President tal-Parlament Ewropew, Antonio Tajani, Joseph Muscat qal li filwaqt li apprezza l-kummenti pożittivi fuq l-awtoritajiet Maltin jifhem il-ħsieb ta’ investigazzjoni internazzjonali għax jista’ jkun li n-nies li huma involuti huma barra minn Malta. “L-iskop u l-idea li l-investigazzjoni, fejn hemm bżonn, tinfirex lil hinn minn Malta aħna naqblu magħha,” qal Joseph Muscat.
Mitlub jikkummenta kif b’kuntrast l-eks Kap tal-Oppożizzjoni, Simon Busuttil, qal li l-Unjoni Ewropea għandha titkellem iktar, Joseph Muscat wieġeb billi qal: “Id-diskors li għamel fil-parlament l-eks Kap tal-Oppożizzjoni fil-fehma tiegħi wera kemm hu bniedem żgħir. M’għandiex kelma oħra kif ngħidha. F’moħħu għandu biss l-idea ta’ kif se jpattiha lil Joseph Muscat.”
Mistoqsi dwar id-dimostrazzjoni favur il-ġustizzja li se ssir fil-Belt il-Prim Ministru qal: “F’dan il-mument kien importanti li jkun hemm organizazzjoni li tmexxi attivita pubblika.”
Żied li fehem, milli qalu l-organizzaturi u dak li qalet il-familja, li hu m’għandux ikun hemm. “Naf fejn ikun posti u ma jkunx posti. Mhux ipokrita u s-sinjali ngħarafhom,” qal Joseph Muscat.
Iżda, talab lill-Partit Laburista biex jattendi u jintbagħat messaġġ ċar ta’ għaqda nazzjonali. “Irid jingħata sinjal. U l-Partit Laburista se jattendi u jappoġġja din il-mixja,” żied il-Prim Ministru.
Dwar il-fatt li l-Kap tal-Oppożizzjoni Adrian Delia ma laqax l-isfida li jitlob inkjesta dwar l-allegazzjonijiet li fuqu għamlet Daphne Caruana Galizia, issa li rtira l-libelli, Joseph Muscat qal: “Naħseb li hu beżgħan.”
Stqarr li hu dejjem żamm pass lura fuq dawk l-allegazzjonijiet għax ma kellux hu l-fatti f’idejh u kien qed jistenna l-eżitu tal-kawżi ta’ libell. Iżda, issa Delia rtira l-kawżi tiegħu.
“F’din is-sitwazzjoni l-uniku option li għandu hi li jagħmel kif għamilt jien. Imur quddiem il-qorti u jgħidlu appunta maġistrat biex jinvestiga. Quddiem il-fatt li jgħid le u li jgħid li ma jilgħabx dan il-logħob, naħseb li hu beżgħan,” qal Joseph Muscat.
Tkellem ukoll dwar il-każ tad-deputat Toni Bezzina fejn issa l-qorti kkonfermat li kien mexa b’mod skorrett meta qabbad ħaddiema tal-gvern u bagħathom jagħmlu xogħol fil-każin tal-PN taż-Żurrieq u wara talabhom jagħmlu dikjarazzjoni falza. Fakkar kif l-eks Kap Simon Busuttil kien jieħu l-passi wara li jinqata’ l-każ mill-qorti. Issa jrid ikun Adrian Delia li jgħid x’se jagħmel.
Mistoqsi dwar il-ġejjieni Joseph Muscat sostna li l-pajjiż għandu futur sabiħ quddiemu. Peró l-poplu għandu bżonn il-ħin tiegħu ta’ niket. “Inkunu insensittivi bħala politiċi jekk ma nindunawx li hemm dak it-tip ta’ ħsieb. Irridu nuru u nagħtu sinjal lil min għamel attakk bħal dan li aħna aħjar minn hekk u mhux se jirnexxielu jwaqqaf il-pajjiż,” qal Joseph Muscat li fisser kif hija r-responsabbiltà tiegħu bħalissa li joffri sens ta’ tmexxija f’mument ta’ skiet, riflessjoni u rabja.
