Il-kriżi tal-enerġija madwar il-kontinent Ewropew kompliet tintensifika hekk kif, mill-jum tal-Erbgħa, il-kumpanija Russa Gazprom, li hija kkontrollata mill-Istat Russu naqqset għoxrin fil-mija tal-provvista tal-gass lejn l-Ewropa.
Dan ifisser tnaqqis ta’ tlieta u tletin miljun metru kubu kuljum mill-provvista ta’ gass mill-pipeline Nord Stream 1 – l-akbar pipeline li jwassal il-gass mir-Russja lejn l-Ewropa.
Minn dan il-pipeline jgħaddi madwar terz tal-provvista tal-gass mir-Russja lejn l-Ewropa.
Matul il-jum tal-Erbgħa għaddiet kapaċità ta’ erbgħin fil-mija tal-provvista tal-gass minn dak li jgħaddi normalment minn dan il-pipeline.
Kawża ta’ hekk, il-prezz tal-gass fl-Ewropa żdied bi kważi tnejn fil-mija u bħalissa l-prezz tal-gass jinsab l-ogħla li qatt kien minn mindu bdiet l-invażjoni Russa fl-Ukrajna fl-aħħar ta’ Frar li għadda.
Il-prezz tal-enerġija permezz tal-gass fl-Olanda għax-xahar ta’ Awwissu żdied b’sebgħa fil-mija, għal total ta’ mitejn u għaxar ewro għal kull megawatt fis-siegħa. Dan ifisser żieda ta’ erba’ mija fil-mija meta mqabbel ma’ sena qabel.
Analisti qalu li l-Gvern Russu qed juża l-gass bħala arma politika. Il-Kremlin kien qal li se jkompli jnaqqas jew saħansitra jwaqqaf il-provvista tal-enerġija bil-gass lejn l-Ewropa. Dan it-theddid min-naħa tar-Russi qed isir minħabba li l-Unjoni Ewropea imponiet diversi sanzjonijiet fuq Moska, b’reazzjoni għall-invażjoni Russa fl-Ukrajna.
Il-kumpanija Russa Gazprom qalet li qed tagħmel dan minħabba ħsarat tekniċi fis-sistema. Min-naħa tagħha, il-Ġermanja qalet li ma tara l-ebda raġuni teknika għal dan it-tnaqqis fil-provvista tal-gass mir-Russja.
Dwar dan, l-Ukrajna akkużat lir-Russja bi gwerra fuq il-provvista tal-gass kontra l-Ewropa.
L-Ewropa wieġbet għal din il-kriżi, hekk kif din il-ġimgħa kien hemm qbil bejn il-Ministri tal-Enerġija tal-Unjoni Ewropea fi Brussell. Il-Ministri qablu li se jnaqqsu ħmistax fil-mija mill-provvista tal-gass tagħhom sa Marzu li ġej bil-għan li l-Unjoni Ewropea jkollha biżżejjed provvista gass għax-xitwa.
Il-prezz tal-gass fl-Ewropa bħalissa jinsab iżjed minn mitejn ewro għal kull megawatt fis-siegħa, filwaqt li l-prezz tal-gass is-sena li għaddiet kien ta’ sebgħa u tletin ewro għal kull megawatt fis-siegħa.
Fir-Renju Unit, il-prezz tal-gass żdied b’seba’ fil-mija u b’hekk il-prezz huwa sitt darbiet iżjed ta’ dak li kien madwar sena ilu.
Il-kontijiet tad-dawl fir-Renju Unit żdiedu b’medja ta’ seba’ mitt lira sterlina fis-sena f’April li għadda. Skont tbassir li sar fir-Renju Unit, il-kontijiet tad-dawl f’sena f’dan il-pajjiż mistennija jkunu ta’ tlett elef, tmien mija u ħamsin Sterlina fis-sena.
