Illum il-President ta’ Malta Marie-Louise Coleiro Preca kellha laqgħa fil-magħluq mal-Papa Franġisku f’Ruma. Dan proprju fil-ġurnata t’għeluq snin il-Papa fejn illum se jkun qed jiċċelebra t-80 sena.
F’kumment ma’ onenews.com.mt, il-President ta’ Malta Marie-Louise Coleiro Preca tkellmet dwar kif pajjiżna għandu jħossu kburi bit-turija tat-talent Malti f’Pjazza San Pietru f’Ruma, dwar id-diskussjoni li kellha mal-Papa Franġisku waqt il-laqgħa ta’ bejniethom u kif ukoll dwar l-istedina li għamlitlu biex jiġi jżur Malta.
Il-President qalet li f’laqgħa kemmxejn twila li kellha mal-Papa Franġisku, hi bdiet billi rringrazzjatu tal-opportunità mill-isbaħ li ta lill-Malta biex jiġi esebit xogħol Manuel Grech u t-tim tiegħu f’Pjazza San Pietru f’Ruma. Dan hekk kif bħalissa il-presepju Malti jinsab armat b’bosta persuni jżuruh u jammiraw t-talent Malti.
Il-President qalet li hi waslet ir-ringrazzjament tal-priġunieri Maltin għall-inizjattiva li l-Papa ħa f’dawn l-aħħar jiem mal-Gvernijiet għas-sena tal-ħniena, fejn ingħatat amnestija ta’ tletin jum lill-priġunieri.
L-Eċċellenza tagħha tkellmet ukoll mal-Papa Franġisku dwar il-Presidenza ta’ Malta tal-Kunsill Ewropea li wieħed mill-oqsma ta’ prijorità li se jkun qed jġi diskuss huwa l-immigrazzjoni. Marie-Louise Coleiro Preca qalet kif hi stiednet lill-Papa biex jiġi Malta biex ikompli jsostni l-pożizzjoni tal-Gvern f’dan il-kuntest tal-imigrazzjoni, il-pożizzjoni ta’ pajjiżna, fejn qiegħed iħeġġeġ il-Membri Stati fl-Unjoni Ewropea biex jgħinu u jinstabu solluzzjonijiet fit-tul għal din il-problema umana.
Id-diskussjoni kienet tinkludi wkoll it-tħassib dwar x’qed jiġri minn mijjiet ta’ eluf ta’ tfal f’każijiet ta’ ġwerer, bħal x’qed jiġri bħalissa f’Aleppo, li qed jispiċċaw f’nofs kunflitti orfni.
Suġġett ieħor li ġie diskuss hu qasam li hu għall-qalb il-Papa, dak li jirigwardja s-solidarjetà. Hi qalet li l-Papa konxju kemm il-poplu Malti juri solidarjetà kemm ma’ xulxin iżda kif ukoll permezz ta’ inizjattivi li jittieħdu.
Meta onenews.com.mt staqsa lill-President xi tfisser għall-poplu Malti li bħalissa hemm il-marka tal-pajjiż f’Ruma. Il-President qalet li bħala pajjiż għandna nħossu sens ta’ kburija f’qalbna għal din it-turija ta’ talent u ħiliet Maltin. Apparti minn hekk hi qalet li l-presepju qed jagħti sens ta’ identità, dan hekk kif dan il-presepju juri dettalji li jirrappreżentaw lill-pajjiżna. Fosthom hemm is-salib ta’ Malta, il-luzzu Malti u saħansitra rifless tax-xogħol li għamel San Ġorġ Preca f’pajjiżna.
Il-President qalet li meta dagħlodu għamlet iż-żjara tagħha fil-presepju, iltaqgħet ma’ numru ta’ Maltin fejn wiċċhom kien jixhed is-sens ta’ kburijali kellhom għal dak li kien esebit f’Pjazza San Pietru.
Meta ġiet mistoqsija rigward l-istedina li għamlet lill-Papa, u x’se jkun l impatt tal-Papa Franġisku fuq Malta, il-President qalet li ż-żjarat passati dejjem ħallew esperjenzi spiritwali iżda kif ukoll impatt qawwi mhux biss ma’ min hu nisrani iżda kif ukoll ma dawk li jħaddnu reliġjon oħra.
Semmiet ukoll dwar kif il-Papa Franġiska jippersonifika ħafna temiet soċjali tal-knisja b’wiċċ uman u kif hu dik it-tip ta’ persuna li filwaqt li jista’ jgħix ħajja fil-kumidità lest iħalli dak kollu biex jifhem lill-batut.
Hi qalet li jekk jiġi Malta mhux biss se tkun esperjenza spiritwali iżda jaf nitgħallmu tgħallima jew tnejn. Fosthom li l-affarijiet materjali fid-dinja ma jfissru xejn meta wieħed iħares lejn affarijiet oħra bħal bżonn ta’ solidarjetà ma’ xulxin u ma’ ħaddieħor u li noħolqu soċjetà aktar inklussiva.
Ritratt: Clifton Fenech
