Hekk kif bħalissa jinsab għal żjara statali fil-Kosovo, il-President ta’ Malta George Vella kellu taħditiet uffiċjali mal-President Vjosa Osmani-Sadriu.
Il-laqgħa bdiet b’konferma miż-żewġ naħat tar-relazzjonijiet eċċellenti li jagħqdu lil Malta u l-Kosovo. Il-President Vella tenna l-appoġġ kontinwu ta’ Malta lill-Kosovo fit-triq tiegħu biex isir membru sħiħ tal-UE u fakkar l-appoġġ ta’ Malta għall-parteċipazzjoni tal-Kosovo f’forums multilaterali.
Matul konferenza stampa eżatt wara t-taħditiet, il-President ta’ Malta qal li huwa jilqa’ r-rapport tal-Kummissjoni Ewropea dwar it-tkabbir, li ħareġ fit-12 ta’ Ottubru, u jħeġġeġ lill-Kosovo tibqa’ fit-triq biex tkompli ttejjeb il-prospettiva Ewropea tagħha. Żied jgħid ukoll li Malta tappoġġa l-proposta tal-Kummissjoni Ewropea għal-liberalizzazzjoni tal-viża. Minn perspettiva reġjonali usa’, il-President Vella qal li r-reġjun tal-Balkani tal-Punent ma jistax ikun separat minn Ewropa stabbli u sigura u mill-Mediterran.
B’referenza għall-ftehim bejn il-Kosovo u s-Serbja, il-President Vella wassal l-appoġġ tiegħu għall-ħidma mwettqa mill-Unjoni Ewropea f’dan ir-rigward. Il-president irrifletta fuq il-bestjalità tal-gwerra, tal-invażjoni u tal-aggressjoni fl-Ukrajna. Hawnhekk, il-President Vella enfasizza wkoll il-ħtieġa li r-reġjun Mediterranju jingħata l-attenzjoni mistħoqqa, u li l-komunità internazzjonali m’għandhiex tistenna li tikkonkretizza l-kriżi fil-viċinat tan-Nofsinhar ta’ Malta qabel ma tieħu pożizzjoni u taġixxi dwarha.
