Il-President ta’ Malta, George Vella, kellu laqgħa mas-Segretarju Ġenerali tan-Nazzjonijiet Uniti, António Guterres, li faħħar ferm lil Malta għall-ħidma tagħha fil-Kunsill tas-Sigurtà tan-Nazzjonijiet Uniti bħala Membru mhux Permanenti.
Irrefera b’mod partikolari għall-mod kif il-Presidenza Maltija tal-Kunsill tas-Sigurtà li kienet mifruxa matul ix-xahar ta’ Frar irnexxielha tindirizza dossiers sensittivi ħafna b’suċċess kbir. Il-gwerra fl-Ukrajna u l-effetti tagħha fuq l-affarijiet globali kienu fiċ-ċentru tat-taħditiet. Tqajmet ukoll l-istabbiltà fil-Mediterran b’enfasi speċifika fuq il-Libja. Sar ukoll skambju ta’ fehmiet dwar il-Proċess ta’ Paċi fil-Lvant Nofsani fid-dawl tal-eskalazzjoni inkwetanti reċenti fit-territorju.
Ilbieraħ filgħodu, il-President Vella għamel diskors waqt Dibattitu Miftuħ dwar il-Protezzjoni tal-Persuni Ċivili f’Kunflitt Armat organizzat mill-Presidenza Żvizzera tal-Kunsill tas-Sigurtà tan-Nazzjonijiet Uniti. Il-President irrimarka li l-ħajjiet ta’ miljuni ta’ persuni ċivili madwar id-dinja għadha qed tiġi mxekkla minn diversi kriżijiet, inkluż il-ġuħ ikkawżat mill-kunflitti, il-vjolenza mmirata, iċ-ċaqliq minn darhom u t-tibdil fil-klima.
Saret referenza wkoll għall-kriżijiet u l-emerġenzi umanitarji kumplessi attwali f’diversi partijiet tad-dinja, bil-President Vella jistqarr li l-Kunsill tas-Sigurtà tan-Nazzjonijiet Uniti jrid jiżgura l-protezzjoni tal-persuni ċivili u jsostni aċċess u appoġġ umanitarju. Barra minn hekk, ħeġġeġ aktar finanzjament għar-risponsi umanitarji.
Wara d-Dibattitu Miftuħ, il-President Vella kellu laqgħat bilaterali separati ma’ Alain Berset, President tal-Konfederazzjoni Żvizzera, Mariam bint Mohammed Saeed Hareb Almheiri, Ministru għat-Tibdil fil-Klima u l-Ambjent fl-Emirati Għarab Uniti , u Mirjana Spoljaric Egger, President tal-International Committee of the Red Crisis (ICRC).
Fi New York, il-President Vella kellu laqgħa bilaterali ma’ Filipe Jacinto Nyusi, il-President tal-Mozambique. Huma ddiskutew opportunitajiet possibbli ta’ kooperazzjoni fl-oqsma tal-investiment, l-edukazzjoni, il-kwistjonijiet marittimi u t-turiżmu. Iż-żewġ partijiet qasmu fehmiet ukoll dwar l-istabbiltà fl-Afrika u kwistjonijiet relatati mal-migrazzjoni.
Il-President kien akkumpanjat mill-Ministru għall-Intern, is-Sigurtà, ir-Riformi u l-Ugwaljanza, Byron Camilleri, ir-Rappreżentant Permanenti ta’ Malta għan-Nazzjonijiet Uniti, Vanessa Frazier, is-Segretarju għall-Presidenza, Rosette Spiteri Cachia, u l-Ambaxxaturi Helga Mizzi u Olaf Terribile.
