Bqajt miblugħ bil-kobor u x-xogħol li hemm fl-organizzazzjoni tal-Istrina, u ħadd ma jista’ jimmaġina x’organizzazzjoni hemm wara avveniment bħal dan.
Kliem il-President ta’ Malta George Vella meta flimkien mas-Sinjura tiegħu Miriam Vella żar l-aħħar preparamenti għall-Istrina fil-Kumpless Sportiv ta’ Ħal Kirkop. Jumejn biss qabel l-ewwel Istrina tiegħu bħala President tar-Repubblika, George Vella kellu biss dawn il-kliem hekk kif ra b’għajnejh il-voluntiera għaddejjin bl-aħħar tħejjijiet.
Dr Vella stqarr: “Bqajt miblugħ. Il-kobor, ix-xogħol u l-kumplikazzjonijiet tal-apparat u l-organizzazzjoni. Ħadd ma jimmaġina x’organizzazzjoni enormi hawn wara dan. In-nies forsi fuq it-tv jaraw nies jagħtu pledge u jirrispondi t-telephones, imma hemm ħafna xogħol. U dan qed ngħidu biex inkun nista’ ngħid grazzi lil kull min kien involut.”
Naturalment ma naqas xejn is-sens ta’ kburija mill-President Vella li ra ammont ta’ voluntiera u anke kumpaniji jagħtu daqqa t’id anke Lejlet il-Milied biex l-Istrina ta’ din is-sena ukoll tkun ta’ suċċess, u tiġbor kemm jista’ jkun fondi għall-Malta Community Chest Fund.
L-Eċċellenza tiegħu, Dr George Vella tenna: “Kemm hawn qlub kbar li huma lesti jagħtu xogħol b’volontarju. Krmm korporazzjonijiet kbar bħall-GO u anke individwi li qed jagħmlu sagrifiċċji anke persnali meta ma jħossuhomx mija fil-mija f’tagħhom imma qed jagħtu x-xogħol tagħhom. Dan huwa l-ispirtu li ġġib l-Istrina.”
Il-President George Vella appella biex il-poplu Malti u Għawdxi jingħaqad u jagħti dik ix-xi ħaġa żgħira li jista’, li kapaċi tagħmel differenza kbira f’ħajjet xi ħadd.
Appell tal-aħħar biex ninsew id-differenzi ta’ bejnietna ma naqasx: “Jiena nagħmel l-aħħar appell biex il-poplu bħal ma għamel fis-snin ta’ qabel u jagħmel dak kollu li jista’ biex jgħin dan il-fond li jagħmel tant ġid tul is-sena kollha. Nirringrazzja lill-poplu Malti u Għawdxi kollu bil-quddiem. “
