Mix-xena tal-futbol lokali, l-ewwel fażi tal-ogħla kampjonat tal-futbol Malti ntemmet proprju matul it-tmiem il-ġimgħa li għaddiet, bl-ewwel fażi tintrebaħ mit-tim ta’ Floriana.
ONE News tkellem maċ-Chairman ta’ Premier League Malta Ltd, Alan Abela, fejn, fl-ewwel reazzjonijiet tiegħu, qasam magħna l-ħsibijiet tiegħu dwar din l-ewwel esperjenza ta’ kampjonat mibdul.
“Kien hemm logħob ibbilanċjat ħafna, forsi m’aħniex kuntenti bl-attendenzi speċjalment f’dawn l-aħħar ħames matchdays u, ovvjament, qed inħarsu ’l quddiem issa għat-tieni fażi. Nemmnu li l-logħob se jkollu togħma ta’ finali, speċjalment fit-tieni fażi, u nħarsu ’l quddiem għall-bidu tat-tieni fażi mill-4 ta’ Jannar ’il quddiem.”
Alan Abela, Chairman, PLM LTD
Dan il-format, li hu tal-ewwel xorta tiegħu f’pajjiżna, għadu qed jindera mill-pubbliku. Dan kien is-sentiment li qasam magħna Abela, meta mistoqsi fuq l-aspettattivi li ntlaħqu mill-Premier League Malti ġdid.
“Ma tistax tagħmel kollox f’daqqa, jiġifieri għamilna ħafna affarijiet f’dawn l-ewwel erba’ xhur. Nemmen li issa l-mument li nikkonsolidaw, hemm affarijiet oħrajn li rridu nagħmlu, rigward prezzijiet ta’ biljetti anke għall-familji. Jiġifieri dawn kollha qegħdin fuq l-aġenda tagħna, imma ovvjament kollox pass pass, jiġifieri ma tistax tagħmel kollox f’daqqa. Nerġa’ ngħid, qed inħarsu ’l quddiem, nemmen li t-tieni fażi se tkun aktar missielta mill-ewwel fażi.”
Alan Abela, Chairman, PLM LTD
Finalment, Abela qasam magħna kif tim partikolari se jkun jista’ jirbaħ il-Kampjonat Malti tal-2024/25 u kif jistgħu jikkwalifikaw għall-kompetizzjonijiet Ewropej.
“Jekk Floriana jerġgħu jirbħu t-tieni fażi, awtomatikament ħa jirbħu l-Kampjonat. It-tieni tim li jiġi wara Floriana, f’dak il-każ jidħol għall-kompetizzjonijiet Ewropej, flimkien ma’ Birkirkara, sakemm ma jkunux Birkirkara. Jekk l-ewwel erba’ timijiet ikunu l-istess, jiġifieri Floriana, Birkirkara, Sliema Wanderes u Hibernians, dawk awtomatikament jidħlu għall-postijiet tal-Ewropa. F’każ li jiġu invertiti r-rwoli, jiġifieri Floriana jiġu t-tieni u Birkirkara jiġu l-ewwel, issir play-off bejn Birkirkara u Floriana. Hemm possibbiltà li jidħol it-tielet tim jew ir-raba’ tim, jew tnejn minnhom, ovvjament fl-ewwel żewġ pożizzjonijiet. F’dak il-każ jiskatta l-mekkaniżmu ta’ final four.”
Alan Abela, Chairman, PLM LTD
