Maurizio! Isem sinonimu mat-tmexxija ta’ One Star Hotel. Il-praspar u l-avventuri tiegħu ma jifqux. Minn storja għal oħra u kull episodju żgur li jnissel tbissima. Ma’ Maurizio jingħaqdu karattri oħrajn li żgur ħa jinżlu tajjeb, ħa jferrħu u jdaħħku lil dawk li mill-ġdid ħa jingħaqdu ma’ dawn il-karattri u jsegwu l-avventuri u l-praspar tagħhom. B’xi mod f’din l-imbiereka lukanda kien jinqala’ minn kollox! Donnu ma setgħux jieħdu ftit ruħ għax dejjem b’xi waħda ġdida!
Fuq produzzjoni ta’ Bonaci Media Entertainment, dan is-sajf fuq ONE nistgħu nerġgħu nsegwu l-ewwel u t-tieni staġun ta’ din is-sensiela komika li oriġinarjament kienet bdiet fuq ONE bħala parti mill-programm ‘Tgħid Ġiet Hekk Hux!’
L-episodji se jixxandru kuljum wara l-aġġornament ta’ ONE News tal-11:30am, iġifieri għall-ħin ta’ 11:40am. L-ewwel episodju mill-ewwel staġun jixxandar it-Tnejn 8 ta’ Lulju.
