Il-Port il-Kbir laqa’ fih vapur tal-qawwa navali Amerikana għal żjara skedata f’pajjiżna.
L-opra tal-baħar iġġib l-isem ta’ USS Ross – DDG-71 u hija il-wieħed u għoxrin opra tal-klassi Arleigh Burke-class guided-missile destroyer.
Il-USS Ross huwa msemmi wara l-kaptan Donald Kirby Ross, li ġie onorat b’midalja ta’ unur mill-Kungress Amerikan minħabba s-servizz erojku tiegħu fis-seklu għoxrin.
L-opra li qed iżżur pajjiżna hija waħda minn erba’ li bħalissa qed isservi fl-Ewropa u tinżamm stazzjonata fil-bażi Navali Amerikana ta’ Rota fi Spanja.
B’tul ta’ aktar minn mija u ħamsin metru, il-vapur kapaċi jilqa’ helikopter fuq wara filwaqt li għandu l-faċilità li jispara l-missili.
Abbord fih ukoll diversi armamenti, u b’mod notevoli turretta li tispara balal ta’ ħames pulzieri.
Din mhux l-ewwel darba li dan il-vapur żar pajjiżna. L-ewwel żjara tiegħu f’Malta kienet f’Awwissu tal-2004.
Ftit tas-snin ilu żar Malta wkoll vapur tal-istess klassi bl-isem ta’ USS Carney.
Bħalissa l-vapur huwa r-responsabbiltà tal-Uffiċjal Kmandant Scott Jones, li ħa t-tmun ta’ dan il-vapur f’Lulju tal-2021.
Jones tkellem magħna dwar ix-xogħol li tagħmel din l-opra tal-baħar.
Qal, “We’re routinely called upon by 6th fleet to operate from the Cape of Good Hope to the Arctic Circle and everything in between. We support our allies and our partners throughout the region for a safe and prosperous Europe.”
Fuq nota aktar personali, l-Uffiċjal Kmandant Jones qal kif il-karriera fil-forzi navali hija stil ta’ ħajja, mhux biss xogħol.
Qal, “It’s absolutely a way of life. I love the sea, I love the ocean and I love what the navy brings not just for the prosperity of the United States but around the world. We can be where our country is and where our partnerships need us at any time with the right number of sailors and the right number of personnel.”
Il-vapur daħal fil-Port il-Kbir is-Sibt u ntlaqa’ mix-Chargé d’Affaires tal-istati Uniti f’Malta, Gwendolyn Green, li qalet li, wara l-isfidi li ġabet magħha l-pandemija, il-portijiet Maltin reġgħu laqgħu vapur Amerikan għal-ewwel darba.
Hija innotat kif il-preżenża ta’ dan il-vapur tfakkar f’kemm huma tajbin ir-relazzjoni li l-qawwiet Amerikani għandhom mal-Mediterran.
