Ġimgħa qabel ma n-nies jivvutaw u jagħżlu l-Partit li se jmexxi lil pajjiżhom fil-ħames snin li ġejjin, Bernard Grech għażel li jagħmel diskors mimli negattività u attakki personali, minflok ippreżenta l-viżjoni tiegħu għall-futur ta’ pajjiżna.
Qal dan il-Ministru Silvio Schembri, f’dibattitu mad-Deputat Nazzjonalista Mario De Marco fuq l-istazzjon nazzjonali.
Il-Ministru saħaq li n-nies ma jridux politika ta’ firda.
Qal, “Kull miżura li nagħmlu qed nagħmluha minħabba l-elezzjoni, jekk inqassmu xi għajnuniet qed nagħmluha minħabba l-elezzjoni, ilhom sejrin hekk sentejn tlieta dawn, kull għajnuna li tajna dejjem għax ġejja l-elezzjoni. Eventwalment ġiet l-elezzjoni u dawn l-ewwel ħaġa li għamlu niżżlu banner mad-Dar Ċentrali biex qalu li se jikkreaw għaxar setturi ekonomiċi ġodda.”
L-ewwel settur li jsemmi l-Partit Nazzjonalista huwa dak tal-advanced manufacturing.
Qal, “Jien ngħidlek staqsi lill-għoxrin elf persuna li taħdem fl-industrija tal-manifattura u staqsihom, inti fil-fabbrika li taħdem inti hemm magni li jagħmlu l-proċess b’mod awtomatiku? Hemm magni li jkollok kompjuter tagħmillu l-proċess li trid inti u l-magna taħdmu kif trid inti? Għax dak huwa advanced manufacturing. Jgħidu li jridu jikkreawh meta Malta ilna snin ninvestu fis-settur tal-advanced manufacturing.”
Ma’ dawn jissemmew ukoll setturi bħall-intelliġenza artifiċjali u l-igaming. Il-Ministru malajr irrimarka li dawn is-setturi ilhom jeżistu u elenka lista sħiħa ta’ kumpaniji li nvestew f’Malta biex iħaddmu u jkabbru dawn l-istess setturi.
Meta kien qed jipprova jikkontradixxih, il-kandidat tal-Partit Nazzjonalista spiċċa jammetti hu stess li dawn is-setturi mhumiex ġodda u hawnhekk anki l-preżentatur tal-programm irrimarka dan.
Qal, “Jiena kont nimmaġina li dawn il-kumpaniji kollha li diġà qegħdin hawn Malta u dawn is-setturi li hu qed jgħid li jeżistu, hawnhekk kien se jsemmihom u jgħidilna kif ħa jsaħħaħhom. Preżentatur: Jiġifieri jeżistu jew le? Mario: Ħa nibdew b’li naqraw.”
Meta l-preżentatur staqsa liż-żewġ mistiedna dwar il-ħidma minħabba l-kriżi fl-Ukrajna, id-Deputat Nazzjonalista qal li l-Partit tiegħu se jagħmel dak kollu possibbli biex jgħin.
B’differenza, il-Ministru u kandidat Laburista qal li l-Partit Laburista għandu l-kredibilità biex iwiegħed li se jkun ta’ għajnuna u dlonk fakkar kif kien aġixxa l-Partit Nazzjonalista fil-Gvern fil-kriżi finanzjarja tal-elfejn u disgħa.
Qal, “Dak iż-żmien, Partit Nazzjonalista fil-Gvern meta kien affaċċjat mill-problema taż-żieda fil-prezz tal-fjuwil b’mod internazzjonali, żied il-kontijiet tad-dawl u l-ilma ġewwa pajjiżna bid-doppju ta’ kemm żdiedu fil-kumplament tal-pajjiżi tal-Unjoni Ewropea. Illum il-ġurnata, pajjiżna huwa l-unika pajjiż mill-pajjiżi kollha tal-Unjoni Ewropea fejn one cent li huwa one cent, il-kontijiet tad-dawl ma żdidux, il-prezzijiet tal-fjuwil naqsu anzi mhux żdiedu, u ma żidna ebda ċenteżmu.”
