- Inkomplu nanalizzaw il-qagħda finanzjarja tal-Partit Nazzjonalista
- Riżultati li mhumiex konformi ma’ standards internazzjonali
Is-sena li għaddiet il-Partit Nazzjonalista kellu bżonn jiddejjen id-doppju ta’ dak li ddejjen is-sena ta’ qabel biex jiffinanzja l-ħidma tiegħu. Dan jirriżulta minn iktar analiżi tal-kontijiet finanzjarji tal-Partit Nazzjonalista. Kontijiet ippreżentati tard lill-Kummissjoni Elettorali u li analisti finanzjarji studjaw f’dettall. Fil-gazzetta Kullħadd sar dak li jissejjaħ debt to equity ratio u hawn ir-riżultat għall-Partit Nazzjonalista xejn mhu sabiħ.
Id-debt to equity ratio huwa aspett importanti ħafna li jintuża fl-analiżi tal-qagħda finanzjarja ta’ kumpanija jew entità. Dan jindika kemm dejn qed tuża kumpanija biex tiffinanzja l-operat tagħha.
Fuq naħa waħda tal-kalkolu wieħed jiehu l-liabilities kollha ta’ kumpanija, jiġifieri dak kollu li għandha tati l-kumpanija. Dan jinkludi djun mal-banek, kontijiet mhux imħallsa, u obbligi lejn terzi, inkluż il-Gvern.
Fuq l-oħra, wieħed jieħu dak li jissejjaħ total equity, jiġifieri d-differenza bejn l-assi ta’ kumpanija u dak li għandha tħallas.
Id-debt to equity ratio fl-analizi finanzjarja jigi msejjaħ b’mod tekniku r-risk jew il-gearing ta’ kumpanija. Kumpanija li jkollha gearing għoli tfisser li tkun waslet f’sitwazzjoni fejn għandha bżonn ħafna dejn biex tkun tista’ tkompli topera. Normalment kumpanija b’gearing għoli ssibha diffiċli biex takkwista aktar dejn mill-banek. Dan għax min isellef ikun xettiku fuqha. Xi ħaġa li tispjega wkoll għalfejn fl-aħħar snin il-Partit Nazzjonalista kellu jdur fuq iċ-ċedoli biex jiffinanzja l-operat tiegħu.
B’livell ta’ dejn ogħla, tiżdied l-ispiża tal-imgħax u dan jista’ jwassal biex il-kumpanija żżid it-telf tagħha u b’hekk jiżdied il-piż tad-dejn.
Fil-każ tal-Partit Nazzjonalista d-debt to equity ratio nbidel minn valur ta’ 1.0 fl-2015 għal valur ta’ 1.9 fl-2016. Skont l-analisti finanzjarji li tkellmu mal-gazzetta KullĦadd żvilupp bħal dan huwa inkwetanti ferm.
Għax huwa dan li jindika li biex jopera fl-2016 il-Partit Nazzjonalista kellu bżonn kważi d-doppju tad-dejn li kellu bżonn sena qabel.
Barra minn hekk, id-debt to equity ratio għal entità bħall-Partit Nazzjonalista huwa mistenni li jkun ferm iżgħar mill-valur ta’ 1.0. Dan minħabba li tipikament entità jkollha bżonn id-dejn biex tixtri assi ġodda bħal proprjetà jew makkinarju.
L-akbar spiża ta’ partit politiku hija fuq pagi u spejjeż amministrattivi u għalhekk mhux mistenni li jkollu bżonn ħafna djun biex jopera.
Indikatur ieħor li jintuża fl-analiżi finanzjarja huwa d-debt ratio. Dan iqabbel id-djun ta’ kumpanija mal-valur totali tal-assi tagħha.
Fl-istudji finanzjarji internazzjonali jingħad li d-debt ratio għandu jkun bejn 30% u 40%, skont il-volatilità tad-dħul ta’ kumpanija.
Dan minħabba li huwa ferm diffiċli li wieħed jagħmel qligħ ta’ aktar minn 40% tal-valur tal-assi u b’hekk ikun ferm diffiċli biex id-djun ta’ kumpanija jitħallsu lura jekk dawn ikunu aktar minn dak il-proporzjon.
Il-Partit Nazzjonalista ra d-debt ratio jiżdied minn 51% għal 65% f’sena waħda biss. Dan huwa livell kważi d-doppju tal-istandards internazzjonali. Fl-2016 il-Partit Nazzjonalista kellu jagħti €10.6 miljun, kontra assi ta’ €16.3 miljun.
It-tielet indikatur finanzjarju li juri li l-qagħda finanzjarja tal-Partit Nazzjonalista sejra għall-agħar jirrigwardja l-proporzjon tad-dħul li qed jintefaq fuq l-imgħaxijiet.
Fil-fatt l-audited accounts jindikaw li l-ispiża fuq l-imgħaxijiet kienet tlaħħaq is-26% tad-dħul tal-Partit Nazzjonalista. Dan meta sa sena qabel dan il-proporzjon kien ta’ 15%. L-ispiża fuq l-imgħaxijiet saret l-akbar spiża tal-Partit Nazzjonalista. Saħansitra aktar mill-pagi tal-uffiċjali tal-amministrazzjoni, li s-sena li għaddiet żdiedu minkejja l-qagħda finanzjarja mwiegħra tal-Partit Nazzjonalista.
Iż-żieda fil-piż tad-dejn, flimkien mat-telf qawwi li jeżisti fil-Medialink, se tkun l-ewwel sfida li se jiffaċċja l-Kap il-ġdid tal-Partit Nazzjonalista. Il-pjan ta’ ristrutturar tal-amministrazzjoni preċedenti kien imfassal fuq medda ta’ 15-il sena. L-audited accounts tal-2016 li nħarġu wara li din l-amministrazzjoni qalet li mhux se terġa’ tikkontesta, jindikaw li hemm bżonn azzjoni ferm aktar immedjata.
Fil-fatt jirriżulta li huwa għalhekk li l-Kap tal-Oppożizzjoni, Simon Busuttil, ma riedx li dawn ir-riżultati finanzjarji jkunu preżentati lill-Kummissjoni Elettorali qabel l-elezzjoni ġenerali.
Fost oħrajn għaliex ma riedx li dawn il-fatti jiġru fost il-partitarji Nazzjonalisti f’mument ta’ kampanja elettorali u f’perjodu li kienu diġà qed jonqsu mill-Partit Nazzjonalista t-tesserati. Tant li kif urejna bil-fatti fl-aħħar ġimgħat jirriżulta li fost l-oqsma minn fejn il-Partit Nazzjonalista daħħal inqas finanzi kien hemm id-dħul mit-tesserati.
