Il-midja tal-Partit Nazzjonalista ħarġet tgħid li kien hemm każ fejn posta tal-Partit Laburista ntbagħtet ma dik tad-Dipartiment tal-artijiet. Iżda, jirriżulta li dan mhux il-każ u saħansitra dan jista’ jkun ikkonfermat mill-MaltaPost.
Fi stqarrija tas-segretarjat parlamentari responsabbli politikament mid-Dipartiment tal-Propjetà tal-Gvern kien spjegat li d-Dipartiment ilu għal dawn l-aħħar snin jagħmel użu mis-servizz tal-Maltapost fejn kull xahar tingħadda soft copy ta’ lista ta’ kontijiet tal-ħlas tal-kera biex il-Maltapost tagħmel xogħol ta’ ipprintjar u tiwi ta’ kontijiet li wara jitpoġġew f’enveloppi biex jintbagħtu lill-inkwilini.
Kif taf tajjeb l-Oppożizzjoni, l-ebda parti mill-proċess minn x’ħin jiġu pprintjati l-kontijiet sa x’ħin jintbagħtu lill-inkwilini ma jsir fid-Dipartiment jew minn impjegati tad-Dipartiment. “Għalhekk, bl-ebda mod ma jista’ jkun hemm xi tip ta’ abbuż ta’ poter kif allegat mill-Oppożizzjoni,” qalet l-istqarrija b’risposta għal stqarrija ta’ Jason Azzopardi.
Fl-istess ħin, l-ebda ittri jew dokumenti addizzjonali ma ntbagħtu lill-Maltapost biex jiġu infilzati mal-kontijiet tal-kera li jintbagħtu lill-inkwilini. “Dan jista’ jiġi kkonfermat mill-kumpanija Maltapost stess li kmieni dalgħodu ntalbet mill-Aġent Direttur Ġenerali tad-Dipartiment Simone Mousu biex tivverifika l-allegazzjonijiet bla bażi tal-Oppożizzjoni,” kompla jkun spjegat.
Fl-aħħar net intqal li huwa ċar li l-unika missjoni tal-Oppożizzjoni hija li tkisser flok tkun kostruttiva. “Filwaqt li l-Kap tal-Oppożizzjoni se jibqa’ mitluf fis-sensiela ta’ attakki żleali lejn il-verità tal-fatti, is-Segretarju Parlamentari Deborah Schembri se tibqa’ ffukata fuq il-ħidma tagħha fi ħdan il-Gvern biex ikomplu jinkisbu r-riżultati li qed iġibu bidla pożittiva fil-ħajja tal-familji u n-negozji f’pajjiżna,” kompla jingħad.
Fi stqarrija l-Partit Laburista qal li bħal ma qiegħed jagħmel il-Kap tal-Oppożizzjoni fuq bażi regolari li jaqbad u jispara l-affarijiet bl-addoċċ mingħajr ma jiċċekja l-fatti, ma kinitx sorpriża li l-mezzi tax-xandir tiegħu jxandru gidba ffabbrikata.
Il-Partit Laburista spjega li l-Kumitat Lokali Laburista tal-Belt Valletta, bħal ma jagħmlu l-Kumitati Lokali kollha, bagħat ċirkulari lill-imsieħba tiegħu biss, ċirkulari li tqassmet fid-djar tal-istess membri mill-Maltapost, l-irċevuta li tidher hawn taħt turi kif dak li provat tagħti l-impressjoni tiegħu l-midja tal-Partit Nazzjonalista li dawn tqassmu ma’ xi karti ta’ xi dipartiment tal-Gvern hija gidba sfaċċata.
Il-Partit Laburista irringrazzja lill-Kap tal-Oppożizzjoni li għoġbu jippublika parti miċ-ċirkulari li ntbagħatet lill-imsieħba taċ-Ċentru Laburista tal-Belt Valletta,tar-reklam li sar dwar il-Maratona Ġbir ta’ Fondi li ħa ssir il-Ħadd 11 ta’ Diċembru li ġej.
[pdf-embedder url=”http://www.one.com.mt/wp-content/uploads/2016/11/Riċevuta-Malta-Post.pdf”]
