Il-Partit Nazzjonalista qed ikompli jqarraq dwar is-sitwazzjoni fil-Kunsill Lokali ta’ Ħal Għargħur, fejn spiċċa jitlef il-maġġoranza u allura t-tmexxija wara laqgħa b’urġenza l-Erbgħa li għadda u l-vot bl-approvazzjoni tal-maġġoranza tal-kunsillieri.
Wara li dakinhar ipprova jfixkel il-proċess tal-vot fuq il-mozzjoni ta’ sfiduċja fis-Sindku, anke jekk dan kollu seħħ skont il-Liġi tal-Kunsilli, is-Sibt bagħat lill-midja tiegħu fil-pjazza ta’ Ħal Għargħur biex jistaqsu lir-residenti x’jaħsbu.
Minkejja dan, mhux kumbinazzjoni, li NET News ħa l-kummenti tal-istess ċorma Nazzjonalisti li ħarġu qatta’ bla ħabel kontra l-vot ta’ sfiduċja f’Helen Gauci u kontra l-kunsilliera Laburista Mariah Meli, li issa hi s-Sindku l-ġdida bl-appoġġ tal-maġġoranza tal-kunsillieri eletti.
Waqt li injora l-fatt li s-sitwazzjoni hi biss frott l-amministrazzjoni ħażina tal-eks Sindku tiegħu Helen Gauci, inkluż bi ħlasijiet abbużivi u irregolari, baqa’ jaħbi kompletament il-fatt li, fl-aħħar ġimgħat, spiċċa b’żewġ kunsillieri minn tlieta.
Dan wara li l-istess tmexxija ħażina tas-Sindku wasslet għar-riżenja mill-Partit Nazzjonalista tal-Viċi Francesca Attard, li żammet is-siġġu bħala indipendenti.
Affarijiet li ġraw u jibqgħu jiġru bħala parti minn kull demokrazija. Iżda, bħas-soltu, il-Partit Nazzjonalista qed jippretendi li s-saltna tad-dritt u l-governanza t-tajba jużahom biss à la cartè, kif ikun jaqbel lilu.
Is-Sibt filgħodu, crew ta’ NET News intbagħat f’Ħal Għargħur fejn ħa biss il-kummenti ta’ ħamsa kollox, li wkoll inzertaw l-istess persuni li kienu preżenti fl-istess laqgħa tal-Kunsill. Dan kif jidher mill-filmat miġbud minn ONE News l-Erbgħa u dawk imxandra min-NET News is-SIbt.
Bħala ċorma żgħira ta’ persuni, orkestrati mill-Partit Nazzjonalista stess, dawn ħolqu l-kommossjoni kollha dakinhar, b’għajjat u tgħajjir, tant li, f’xi mumenti, kellhom jiġu mrażżna mill-Pulizija preżenti.
Magħhom kompliet ukoll l-istess Helen Gauci, waqt li l-maġġoranza tal-kunsillieri vvotaw favur il-mozzjoni ta’ sfiduċja fiha.
Wieħed minn dawn, li wkoll sejjaħ għal elezzjoni mill-ġdid f’Ħal Għargħur, hu l-kandidat Nazzjonalista Carmenu Muscat, li kkontesta żewġ elezzjonijiet tal-istess Kunsill Lokali, iżda bla suċċess.
F’messaġġi, li tella’ fuq Facebook fl-aħħar jiem, dan tefa’ pressjoni fuq Francesca Attard meta rriżenjat mill-Partit Nazzjonalista u, wara l-vot ta’ nhar l-Erbgħa, ittimbraha bħala “traditur”.
Minbarra hekk, fost dawk preżenti fil-laqgħa l-Erbgħa u tan-NET reġgħu ħadulha kumment is-Sibt, kien hemm Rosemarie Galea, li riċentament iddikjarat fuq il-midja soċjali li kollox kien ippjanat. Saħansitra allegat li Attard kienet ixxaħħmet biex irriżenjat mill-Partit Nazzjonalista u, imbagħad, ivvotat favur l-isfiduċja ta’ Helen Gauci.
Oħra, ċerta Karen Vella Debono, saħansitra tindika fuq il-Facebook tagħha li lanqas tgħix f’Ħal Għargħur, għalkemm hi minn hemm. Hi tiddikjara li toqgħod il-Mellieħa, li allura, wisq probabbli, lanqas tivvota fl-elezzjoni hawnhekk.
Sadanittant il-Partit Nazzjonalista wkoll għażel li jsejjaħ lill-midja għal konferenza tal-aħbarijiet dwar il-vot ta’ sfiduċja f’Helen Gauci u qagħad iqabbel il-voti miksuba f’din il-lokalità, biex mingħalih jagħti impressjoni li s-sitwazzjoni ta’ Ħal Għargħur hi differenti minn ta’ lokalitajiet oħrajn.
Minkejja dan, kif ġie rrimarkat mill-Partit Laburista, huma s-siġġijiet li jiddeterminaw min imexxi kunsill u mhux il-voti u l-Partit Nazzjonalista għandu jħares lejn il-mera u jagħmel eżami tal-kuxjenza biex jara għaliex tilef il-maġġoranza li kellu.
