“Jekk hawn xi ħadd li m’għandux pjan u direzzjoni fil-pajjiż mhu ħadd ħlief il-Partit Nazzjonalista. Kuljum joħroġ b’xi ħaġa ġdida u lanqas ikun jaf x’qal il-ġurnata ta’ qabel.” Dan intqal fi stqarrija mill-Partit Laburista.
Mela l-PN l-ewwel ħareġ jattakka l-miżuri li tħabbru b’rabta mat-traffiku, fl-istess nifs Bernard Grech qal li l-miżuri huma kkuppjati mill-ideat tagħhom u biex jippruvaw iġibuha żewġ wara t-tgerfixa li għamlu l-Ħadd li għadda, għamlu konferenza tal-aħbarijiet oħra llum jgħidu li dan il-Gvern ma kkonsultax qabel ħareġ il-miżuri. Insew li qabel dawn il-miżuri, tħabbru proposti li ġew ikkonsultati mal-esperti, mal-imsieħba soċjali u mal-pubbliku u b’hekk issarrfu f’miżuri.
Aktar minn hekk, joħroġ biċ-ċar kemm il-Partit Nazzjonalista irid li t-trasport qatt ma jiġi indirizzat f’pajjiżna. Komdi jikkritikaw, ma jipproponu xejn u jistaħbew biss wara l-alternattiva tat-trasport tal-massa, soluzzjoni li tista’ ssir fuq għexieren ta’ snin. Il-ħtiġijiet tal-mument ma jinteressahomx minnhom.
Mal-PN ma tafx fejn int. Agħar minn hekk, l-Oppożizzjoni m’għandhiex kredibilità. Dan il-Gvern se jibqa’ jirriforma u jieħu deċiżjonijiet kuraġġużi fl-aqwa interess tal-Maltin u l-Għawdxin.
