• MAĊ-ĊEDOLI, MILJUNI XI JĦALLAS FI DJUN MAL-BANEK
• ANALISTI FINANZJARJI JISPJEGAW LI DAN IPPOĠĠI F’RISKJU S-SUPPOST SELF LI ĦA L-PN
• SE JIĠRI LI ĦASBU ĦAFNA U S-SELF JINBIDEL F’GĦOTJIET?
L-analiżi tal-qagħda finanzjarja tal-Partit Nazzjonalista turi wkoll li jeżistu riskji serji għas-self biċ-ċedoli jekk il-Partit Nazzjonalista ma jibdilx ir-rotta li qabad fl-aħħar ftit snin.
Mill-kontijiet ippreżentanti quddiem il-Kummissjoni Elettorali jirriżulta li sa issa l-Partit Nazzjonalista ma beda jħaddem ebda pjan biex f ’inqas minn 10 snin ikun jista’ jħallas lura ċ-ċedoli kif imwiegħed fil-kuntratti ma’ min sellef il-flus b’mod anonimu lill-partit.
Fil-fatt, filwaqt li l-amministrazzjoni tal-Partit Nazzjonalista ppruvat tindika li sar xi titjib fil-qagħda finanzjarja f ’dawn l-aħħar snin il-kontijiet li l-Partit Nazzjonalista ppreżenta lill-Kummisjoni Elettorali (tard, wara l-elezzjoni ġenerali) juru eżatt bil-maqlub. Se tmiem is-sena li għaddiet il-Partit Nazzjonalista akkumula telf finanzjarju ta’ €6.6 miljuni. Dan l-aktar minħabba telf qawwi li qed isir fis-sussidjarji tal-Partit Nazzjonalista, speċjalment il-kumpanija Medialink.
Il-qagħda tal-Medialink tidher li sejra mill-ħażin għall-agħar. Fil-fatt, it-total ta’ telf akkumulat tal-Medialink sal-2016 kien ilaħħaq l-€10.2 miljuni. Hija din is-sitwazzjoni li skont analisti finanzjarji li 
analizzaw il-kontijiet għal din il-gazzetta tista’ tpoġġi f ’periklu serju lil dawk li poġġew flushom fiċ-ċedoli. Għax filwaqt li l-amministrazzjoni Nazzjonalista qalet lil dawn il-persuni li fi żmien 10 snin se jieħdu flushom lura, fl-ewwel sena mindu nfetħet l-iskema, ma kien hemm l-ebda indikazzjoni li dan jista’ jseħħ.
Il-Partit Nazzjonalista mhux talli ma bediex ifaddal biex eventwalment ikun jista’ jħallas lura ċ-ċedoli, imma talli s-sena li għaddiet għamel telf finanzjarju ta’ €1.6 miljun fl-2016. Dan wara li kellu jitgħabba bil-piż ta’ sena finanzjarja ħażina oħra għall-kumpaniji sussidjarji. B’kuntrast, skont prinċipji finanzjarji konservattivi, suppost il-Partit Nazzjonalista poġġa fil-ġenb madwar €350,000 ħalli jkun jista’ jħallas iċ-ċedoli lura fl-2026. Dan minħabba li ssellef €3.5 miljuni fuq 10 snin. Fir-realtà minflok faddal, il-Partit Nazzjonalista kompla jonfoq ferm aktar milli jaqla’.
Minbarra ċ-ċedoli, fis-snin li ġejjin il-Partit Nazzjonalista jrid iħallas lura diversi djun ma’ banek kummerċjali. Din is-sena l-PN irid iħallas dejn ta’ €415,210 u fi żmien sentejn għandu jagħti €418,596, segwit fit-tliet snin ta’ wara b’pagamenti ta’ djun li jlaħħqu l-€1.3 miljun. Sal-2025 irid iħallas dejn ta’ €1.2 milun ieħor u fl- 2025 jiskadi dejn ieħor ta’ €2 miljuni.
F’sitwazzjoni fejn id-dħul tal-Partit Nazzjonalista dejjem qed jonqos u l-ispiża qed tispara ’l fuq, is-sitwazzjoni tal-Partit Nazzjonalista tinħass li qed issir kritika.
L-emoraġija ta’ fondi fil-Medialink ma hija tgħin xejn lis-sostenibilità tal-finanzi tal-partit. Jidher li minflok isibu soluzzjoni għall-problema ta’ pagamenti lura tad-dejn mal-banek, l-amministrazzjoni preżenti ppruvat taħrab b’mod temporanju billi tissellef permezz taċ-ċedoli.
Fil-fatt irrapportajna iktar minn darba kif dan kien eżerċiżżju fejn dejn tmexxa minn naħa għal oħra. Imma issa qed joħroġ ċar ukoll li mingħajr azzjoni konkreta biex tinqata’ l-ħela kbira fuq konsulenzi u pagi fl-amministrazzjoni tal-partit, ftit li xejn hemm tama biex il-finanzi tal-Partit Nazzjonalista jiġu fis-sod. Imkejjen fid-Dar Ċentrali sostnew kif wara l-elezzjoni ġenerali saħansitra bdew jitqajmu dubji dwar kemm jista’ jitħallas l-imgħax dovut fuq iċ-ċedoli kif ukoll l-kapital tagħhom.
Jidher li min se jidħol għat-tmexxija tal-Partit Nazzjonalista se jiffaċċja sitwazzjoni ferm agħar minn dik li kien hemm fl-2013 għax dakinhar id-dejn tal-partit u t-telf tal-Medialink kienu ferm anqas milli huma llum.
Dan kollu f ’mument fejn is-sena li għaddiet naqas ukoll id-dħul mit-tesserati tal-partit u l-ogħla uffiċjali tal-partit ħadu żieda ta’ 11% fis-salarji tagħhom kif irrapportat f ’din il-gazzetta ta’ nhar il-Ħadd li għadda.
