“Il-ftehim mal-infermiera dwar ftehim settorjali ġdid se jfisser investiment fi professjoni li hi importanti ferm fis-servizz tas-saħħa, u allura servizz aħjar lill-pazjenti tagħna.”
Dan kien il-messaġġ tal-Prim Ministru u Mexxej Laburista Robert Abela waqt intervista fuq ONE Radio s-Sibt filgħodu, hekk kif aċċenna għall-approvazzjoni b’saħħitha tal-ftehim settorjali ġdid għall-infermiera u l-qwiebel, b’vot b’saħħtu ta’ 87%, il-Ġimgħa filgħaxija.
Fost il-kundizzjonjiet aħjar li se jkollhom l-infermiera u l-qwiebel huma li f’kull grad se jkunu qed jirċievu ‘management allowance’ u s-6.6 sigħat li l-infermiera u l-qwiebel kien jaħdmu bħala parti mir-roster tagħhom se jkunu mħallsin bir-rata ta’ overtime u mhux bi flat rate fost oħrajn.
Il-Prim Ministru Robert Abela qal li dan b’dan il-ftehim l-infermiera se jkollhom l-aqwa pagi u l-aqwa kundizzjonijiet li qatt kellhom.
Qal, “Dan il-ftehim li wasalna għalih, l-infermiera u l-qwiebel se jkollhom l-aqwa pagi li qatt kellhom f’dan il-pajjiż. Se jkollhom l-aqwa kundizzjoniet tax-xogħol, l-aqwa allowances li qatt kellhom. Għandek prattiċi li jmorru lura għal numru ta’ snin li se nibdluhom f’dan il-ftehim li jittrasformaw ruħhom f’kundizzjonijet tax-xogħol aħjar.”
Il-Prim Ministru Robert Abela rrimarka li l-MUMN rat li hemm bżonn li jiġu attirati aktar nies lejn dawn il-professjonijiet importanti, li biex tidħol għalihom irid ikollok l-imħabba lejn il-pazjent. Għalhekk, ftehim kollettiv li joffri kundizzjonijet tax-xogħol b’saħħithom, huwa pass importanti favur dan l-għan.
Dr Abela qal li huwa ta’ sodisfazzjon li l-istess impenn li wera l-Gvern għal għexieren ta’ ftehmiet kollettivi oħrajn fosthom għall-forzi tal-Ordni f’pajjiżna, issa qed jiġi rifless f’dan il-ftehim importanti għall-infermiera u l-qwiebel.
Madankollu, il-Prim Ministru spjega li dan il-qbil favur ftehimiet aħjar għall-ħaddiema Maltin u Għawdxin ma jkunx possibbli mingħajr pajjiż b’ekonomija b’saħħitha li tikber b’mod sostennibli.
Stqarr, “Għalhekk li jrid ikollok pajjiż li dejjem jinsab miexi ‘l quddiem, li għandu ekonomija b’saħħitha, tikber u tagħmel dan b’mod sostennibli. Għalhekk kontinwament nisħaq fuq dan it-terminu tat-teħid tad-deċiżjonijiet biex inkomplu mmexxuh ‘il quddiem dan il-pajjiż u ekonomikament inżommuh dejjem wieħed b’saħħtu.”
Il-Prim Ministru qal ukoll kif fil-budget li jmiss se jkompli jittieħdu inizjattivi favur dan il-għan ħalli pajjiżna jibqa’ fuq quddiem nett fl-Ewropa fost dawk bl-aktar ekonomiji li joħolqu xogħol.
Intant il-Prim Ministru sostna li għalkemm il-ħidma f’dawn l-oqsma hija importanti, l-esperjenza li tinżel fit-triq u titkellem man-nies li ġejjin minn setturi differenti tal-ħajja, tibqa’ kruċjali għat-tfassil tal-politika tal-Gvern.
Il-Prim Ministru temm jgħid li l-iktar fattur importanti huwa li tara poplu maqgħud, għaliex bir-rispett u bl-imħabba, il-poplu Malti u Għawdxi dejjem mexa u jibqa’ jimxi ‘l quddiem.
Qal, “Li tara poplu tant maqgħud, poplu Għawdxi, poplu Malti li tant iħobb u jirrispetta lil xulxin. Kull meta dan il-pajjiż kien maqgħud dejjem mexa’ l quddiem. Sfidi kbar kellna. Dawn l-aħħar tliet snin kellna biss biss l-isfida tal-pandemija li kienet waħda massiva. Għax konnha maqgħudin imxejna ‘l quddiem u jekk nibqgħu maqgħudin, ikunu xi jkunu l-isifidi f’pajjiżna, minnhom noħolqu opportunitajiet u nibqgħu mexjin ‘il quddiem b’risq dan il-pajjiż li lkoll kemm aħna nħobbu.”
Aqra wkoll:
