Id-diskors tal-Prim Ministru Robert Abela fil-Parlament kien ikkaratterizzat minn risposta qawwija u b’saħħitha dwar il-qasam ambjentali.
Fil-fatt, il-Prim Ministru qal li ma jistax ikollna pajjiż aktar b’saħħtu jekk ma jkollnix ambjent aħjar.
Hawnekk Dr Abela tkellem fost oħrajn dwar il-miżura fil-Budget fejn fiha l-Gvern wiegħed li se jibda proġett ta’ afforestazzjoni fiż-żona magħrufa bħala dik tal-Inwadar.
Miżura li tikkuntrasta ferm aħjar mal-eżerċizzju ta’ Gvern Nazzjonalista meta fl-2006 art verġni daqs is-Siġġiewi għamilha li tista’ tiġi żviluppata.
Qal, “Sejrin għalhekk nibdew il-proġett ta’ afforestazzjoni ambizzjuż b’aktar minn 50,000 siġra. Park kbir daqs il-Buskett li jista’ jitgawda mill-familji, l-Inwadar f’Wied il-Għajn. Dawn huwa legat li rridu nħallu warajna għal uliedna.”
Mil-lat ambjentali il-Prim Ministru rrimarka wkoll kif Gvern Laburista huwa kredibbli f’dan il-qasam minħabba d-deċiżjonijiet għaqlin li wasslu għal inqas emmissjonijiet mis-settur tal-enerġija u minn dak tat-trasport fost oħrajn.
Dwar dan il-Prim Ministru fakkar ukoll fil-miżura ewlenija li tħabbret fil-Budget.
Spjega, “Mhux talli m’għollejniex il-fuel, talli ħabbarna li se nagħtu trasport pubbliku b’xejn għal kulħadd. Din miżura qawwija ħafna ambjentalment imma wkoll soċjalment għax se twieżen sew lil dawk li m’għandhom ebda mezz ta’ trasport ieħor.”
Fuq is-suġġett tat-trasport il-Prim Ministru aċċenna wkoll għall-proposta tal-Metro miftuħa għad-diskussjoni.
Huwa esprima s-sodisfazzjoni tiegħu għad-diskussjoni li qamet fl-aħħar jiem fosthom dik dwar ir-reklamazzjoni tal-art fejn tenna li din hija meħtieġa llum qabel għada.
Madankollu tenna li issa il-Gvern u l-poplu għandhom ikomplu jiddiskutu u jiddeċiedu fl-interess tal-ġenerazzjonijiet futuri.
Sostna kif, “Ma nistgħux niġu f’sitwazzjoni fejn għoxrin sena oħra uliedna jgħidu l minħabba l-indeċiżjoni tagħna, illimitajna l-kwalità tal-ħajja tagħhom. Irridu nħarsu ’l quddiem u nagħmlu għażla tajba għalina u għalihom.”
Dwar is-settur ambjentali, il-Prim Ministru Robert Abela ma naqasx ukoll milli jinnota l-iżball tal-Kap tal-Oppożizzjoni Bernard Grech meta tkellem dwar miżura li tolqot il-propjetajiet f’żona ta’ konservazzjoni urbana.
Qal kif, “Kien għalhekk li neħħejna t-taxxa kollha dwar il-qliegħ kapitali u tal-boll fuq bejgħ ta’ propjetajiet ta’ kategoriji li identifikajna għal skop speċifiku, sal-valur ta’ €750,000. Issa lbieraħ ġie hawn il-Kap tal-Oppożizzjoni u qal li hu kieku jdaħħal din il-miżura għal kull propjeta f’urban conservation area u mhux biss dawk li ilhom battala 7 snin. Kieku ndenjajt ruħek taqra d-diskors tal-Budget u mhux qrajt biss li kitbulek biex tgħid, kont tinduna li hekk qiegħda l-miżura diġà!”
Hawnhekk il-Prim Ministru fakkar ukoll fl-inċentivi favur ix-xiri tal-propjetà mill-Gvern li se jgħinu aktar nies isiru sidien ta’ djarhom. Dan anke għal dawk li jixtru l-propjetà tagħhom f’Għawdex jew min saħansitra jagħżel li jirranġa l-propjetà tiegħu.
Intant il-Prim Ministru nnota kif l-inċentivi ambjentali għall-poplu ma naqsux fil-Budget għall-2022.
Semma fost oħrajn l-importanza tal-elettrifikazzjoni tal-vetturi f’pajjiżna u b’hekk l-inċentiva miżjuda u li tammonta għal €12,000 biex il-poplu jinvesti f’vetturi elettriċi jew plug-in hybrid.
L-istess, il-Prim Ministru fakkar f’għajnuniet simili għall-industrija u n-negozji permezz tal-Malta Enterprise.
