Il-vaċċin huwa importanti fil-ġlieda kontra l-Covid-19.
Dan saħqu l-Prim Ministru Robert Abela waqt summit virtwali tal-Kunsill Ewropew, li sar matul il-jum tal-Ħamis.
Il-Prim Ministru Robert Abela saħaq fuq il-bżonn li jitħaffef il-proċess tal-produzzjoni u fid-distribuzzjoni tal-vaċċin, sabiex aktar nies jitlaqqmu.
Dr Abela spjega li b’aktar nies imlaqqma, ikunu jistgħu jitħaddmu mekkaniżmi bħaċ-ċertifikat ta’ vaċċinazzjoni sabiex tkun tista’ terġa’ tibda t-triq lura lejn in-normalità f’dak li għandu x’jaqsam ma’ safar b’mod sigur.
Dwar dan is-suġġett, il-mexxejja Ewropej ma bdewx jaqblu kif għandhom jitqassmu għaxar miljun doża ta’ vaċċin żejda, tant li issa dan il-proċess tħalla f’idejn ir-rapprezentanti permanenti tal-istati membri.
Dan is-suġġett kien diskuss hekk kif il-Kanċillier Awstrijak kien ilmenta li Malta qed tirċievi wisq dożi tal-vaċċin, fejn intbagħtet ittra lill-President tal-Kummissjoni Ewropea.
Rapporti fil-midja internazzjonali qalu li l-Kanċillier Awstrijak ilmenta li pajjiżu għandu jirċievi iżjed dożi tal-vaċċin iżda ċifri tal-Kummissjoni Ewropea juru li dan il-pajjiż ħa numru konsiderevoli ta’ dożi tal-vaċċin għall-Covid-19.
Intant, waqt konferenza tal-aħbarijiet wara s-summit tal-Kunsill Ewropew, il-President tal-Kummissjoni Ewropea Ursula von der Leyen qalet li l-kumpanija AstraZeneca trid tonora l-wegħda tagħha u tibgħat il-kunsinji li qalet li se tibgħat lill-Unjoni Ewropea qabel ma tesporta dożi xi mkien ieħor.
Il-mexxejja Ewropej tkellmu wkoll dwar is-suq waħdieni, li fi kliem il-Prim Ministru Malti huwa ċ-ċavetta tal-kompettività ta’ pajjiżna.
Hawnhekk Dr Abela saħaq dwar il-ħtieġa ta’ investiment fil-qasam diġitali.
Fuq l-aġenda ta’ dan is-summit kien hemm ukoll il-Lvant tal-Mediterran fejn hawn il-Prim Ministru rrikonoxxa l-iżviluppi pożittivi li ġraw fit-Turkija, fejn innota l-importanza ta’ djalogu kontinwu u strutturat ma’ dawn l-imsieħba.
Dr Abela nnota b’dispjaċir l-irtirar tat-Turkija mill-Konvenzjoni ta’ Istanbul, hekk kif l-Unjoni Ewropea ffirmat din il-konvenzjoni waqt il-Presidenza Maltija tal-Kunsill tal-Unjoni Ewropea.
Intant waqt l-istess summit, waqt skambju pożittiv mal-President tal-Istati Uniti Joe Biden, il-mexxejja Ewropej iddiskutew it-tiġdid tar-relazzjonijiet mal-Istati Uniti. Iż-żewġ naħat tkellmu dwar il-ħidma kontra t-tibdil fil-klima u t-tisħiħ ta’ relazzjonijiet kummerċjali.
Id-diskussjoni waqt is-Summit taż-Żona tal-Euro ffukat fuq l-irwol tal-ewro fuq livell mondjali, bil-pożizzjoni ta’ Malta kienet dwar l-importanza tal-ekonomija l-ħadra u l-oqsma diġitali biex l-ewro ssir aktar kompetittivà.
