Dan il-Gvern jifhem ir-realtajiet tan-nies, anke ta’ dawk li jitqiesu bħala minoranza.
Dan intqal mill-Prim Ministru Robert Abela waqt kollegament telefoniku fuq ONE Radio.
Dr Abela ħabbar kif din il-ġimgħa waslet il-mediċina għall-pazjenti li jbatu mill-kundizzjoni tas-Cyctic Fibrosis, u li din se tingħata mill-Gvern.
Huwa semma kif meta tkellem ma’ Mandy Vella, li hija pazjenta b’din il-kundizzjoni, huwa baqa’ jara kif inhi u jitkellem magħha.
Hawnhekk, il-Prim Ministru radd ħajr lit-Taqsima Ċentrali għall-Kuntratti u l-Kunsinji fi ħdan il-Ministeru għas-Saħħa, tax-xogħol li għamlet sabiex wasslet dawn il-mediċini.
Il-Prim Ministru qal kif din il-ġimgħa, il-Gvern ħabbar li se tkun qed tingħata b’xejn il-mediċina għal dawk li se jagħmlu l-IVF.
Dr Abela qal kif dan il-Gvern isegwi l-ħidma li jkun wettaq u jibqa’ jitkellem man-nies u l-familji Maltin u Għawdxin sabiex is-servizz jibqa’ jitjieb.
Huwa qal, “Imma dan huwa Gvern li mhux indifferenti għar-realtajiet tan-nies, għall-bżonnijiet tan-nies, anke ta’ gruppi li forsi fis-soċjetà tagħna jistgħu jagħmlu minoranza. Kull darba jkollna pjan fejn nibnu mbagħad inizjattiva fuq oħra. Dejjem tibni fuq l-inizjattivi li tkun niedet waħda wara oħra.”
Il-Prim Ministru tkellem ukoll fuq il-Pjan ta’ Rkupru minn fondi Ewropej u l-viżjoni għal wara l-pandemija, li tħabbar din il-ġimgħa. Qal li din l-istrateġija se twassal biex titjieb il-kwalità tal-ħajja, biex jissaħħu n-negozji u x-xogħol u jkun hemm l-aqwa rkupru possibli mill-pandemija.
Hawn innota wkoll in-negattività tal-Kap tal-Oppożizzjoni, hekk kif sejjaħ dan il-pjan huwa froga: “Dan l-istess, infakkar, Kap tal-Oppożizzjoni, li l-investiment li għamilna f’pandemija fin-negozji u l-ħaddiema x’sejjaħlu, tberbiq ta’ flus. Il-Wage Supplement, l-investiment fil-vaċċin u dak ix-xogħol kollu li sar biex isalva l-impjiegi u s-saħħa tan-nies wasal biex sejjaħlu tberbiq ta’ flus. Imma fl-aħħar mill-aħħar, in-nies jiġġudikaw, mhux x’jgħid il-Kap tal-Oppożizzjoni. Il-ġudizzju jagħmluh in-nies.”
Il-Prim Ministru Robert Abela fakkar kif dan il-Gvern sena ilu ġab id-doppju ta’ fondi Ewropej minn tal-2012, fi żmien Gvern Nazzjonalista, minkejja li l-ekonomija ta’ pajjiżna kienet akbar minn dak iż-żmien.
Dr Abela nnota kif din il-ġimgħa, il-Eurostat ħareġ kif 2,500 persuna li kienu bla xogħol, sabu impjieg f’dawn l-aħħar għaxar xhur.
Huwa sostna: “Nibqgħu Gvern mhux supperv u meta fin-nofs ikun hemm il-ġid tal-poplu Malti u Għawdxi, aktar u aktar nibqgħu nieħdu d-deċiżjonijiet kollha illi huma meħtieġa, għaliex nafu li l-fiduċja li jagħtina l-poplu ta’ kuljum, irridu naħdmu biex inżommuha biex nibqgħu nippreservawha. Mhux biex ngħidu li aħna popolari fin-numri, imma biex nibdlu għall-aħjar dejjem il-ħajja tal-Maltin u l-Għawdxin.”
