F’ruling li ta l-Ispeaker tal-Parlament Anġlu Farrugia ma sabx li kien hemm ksur ta’ privileġġ wara li ssemma kif deputati Nazzjonalisti bagħtu lid-Deputat Prim Ministru u Ministru għas-Saħħa, Chris Fearne, biex iqabbżu l-kju u jitlaqqmu għall-vaċċin kontra l-Covid-19.
Din id-deċiżjoni ingħatat mill-Ispeaker, wara li ġimgħa l-oħra d-Deputat Prim Ministru u Ministru għas-Saħħa Chris Fearne żvela kif kien hemm iżjed minn deputat wieħed tal-Partit Nazzjonalista li talbu biex iqabbżu l-kju fl-għoti tat-tilqim.
Fir-ruling li ta, Anġlu Farrugia ssuġġerixxa li l-membri parlamentari għandhom jieħdu t-tilqima.
Wara din id-deċiżjoni mill-Ispeaker, il-Prim Ministru Robert Abela qal li ma jħossx li minħabba l-kariga tiegħu jieħu preċedenza u jieħu l-vaċċin għall-Covid-19 qabel ħaddieħor.
Il-Prim Ministru Robert Abela stqarr: “Jien għandi rispett sħiħ lejn ir-rulings li tat is-sedja, però minkejja li nifhem is-suġġeriment li għamilt fl-aħħar tar-ruling, ma nħossx li għandi, minħabba l-kariġa tiegħi ningħata preċidenza fuq min jeħtieġ il-vaċċin b’aktar preċidenza minni.”
Wara qam il-Kap tal-Oppożizzjoni Bernard Grech u filwaqt li qal li ma jaqbilx mar-ruling, saħaq li se jikkontesta d-deċiżjoni tal-Ispeaker.
Huwa qal: “Però din se nikkontestaha għaliex huwa ċar illi dak li tlabt mhuwiex eżattament dak illi ġie rriferut fir-ruling.”
Imbagħad kompla jinfexx jattakka l-programm ta’ tilqim ta’ pajjiżna u qal li huwa mbagħbas.
Bernard Grech sostna: “F’roll-out ta’ vaċċin illi huwa mbagħbas.”
Din id-dikjarazzjoni ta’ Bernard Grech qalha fil-Parlament wara li pajjiżna huwa l-iżjed pajjiż fost il-pajjiżi kollha tal-Unjoni Ewropea li qed ilaqqam nies u fis-sigħat li ġejjin se jkun ta mitt elf doża tal-vaċċin għall-Covid-19.
