Dan huwa l-Gvern tar-riformi u li huwa viċin in-nies għax jifhem ir-realtajiet tan-nies.
Dan intqal mill-Prim Ministru Robert Abela waqt diskors it-Tnejn filgħaxija fil-Parlament, hekk kif bdiet tiġi diskussa r-riforma fil-liġi tal-kera għal dawk il-kirjiet ta’ qabel l-1995.
Il-Prim Ministru nnota kif Gvern immexxi minnu jħaddan il-prinċipju tal-ġustizzja soċjali.
Huwa stqarr: “Il-prinċipju tal-ġustizzja soċjali li jispirana biex nagħmlu dawn ir-riformi. Ħaddieħor qalilna lbieraħ li qed nagħmlu riformi biex naljenaw lin-nies. Mhux ta’ b’xejn qatt m’għamiltx riformi bis-serjetà.”
Il-Prim Ministru Robert Abela qal kif permezz ta’ din il-liġi li qed iressaq, il-Gvern qed jindirizza l-isfida għall-inkwilini u s-sidien tal-proprjetà billi tal-ewwel jgħinhom u lis-sidien itihom kumpens xieraq għall-valur tal-proprjetà tagħhom.
Innota kif l-istituzzjonijiet lokali u anki Ewropej, fosthom il-Qorti Ewropea għad-Drittijiet tal-Bniedem ilha 21 sena tgħid lill-pajjiżna sabiex jindirizza l-problema tal-kirjiet.
Saħaq kif ir-riforma hekk kif imressqa minn Gvern Nazzjonalista, ftit iżjed minn għaxar snin ilu ma kinitx konformi mal-Kostituzzjoni u l-konvenzjoni Ewropea.
Irrimarka li mhux l-istess jista’ jingħad għar-riforma mressqa issa.
Saħaq li l-problema li tefgħet taħt it-tapit dik li llum qiegħda fl-Oppożizzjoni waslet għall-piż fuq kull ċittadin Malti u Għawdxi li jħallas it-taxxa.
Dr Abela sostna: “Xeħtet il-problema taħt it-tapit. Għamlet, tat dik it-taparsi is-soluzzjoni li ħolqot problema flok offriet rimedju. Għalhekk li ġara dak li ġara b’mod konsistenti matul is-snin. Imbagħad, x’ġara matul is-snin? Qabel l-2010 u wara l-2010, li kull wieħed, kull min għax hemm minn ma iħallas it-taxxi tiegħu. Kull min iħallas it-taxxi tiegħu f’dan il-pajjiż, ibati mill-piż tal-kompromess li l-qrati tagħna u l-Qorti Ewropea bdew jagħtu kontra l-istat Malti sentenza wara sentenza. Kumpens li jekk nikkalkulaw kemm tela’ miljuni u għexieren ta’ miljuni. Dan qed jitħallas minn kulħadd f’dan il-pajjiż, kull ċittadin onest li jħallas it-taxxi tiegħu.”
Il-Prim Ministru tenna kif din ir-riforma qed tindirizza l-weġgħat tan-nies, hekk kif se tgħin dawk l-aktar vulnerabbli, fosthom il-pensjonanti.
Huwa saħaq: “Persuna, pensjonant illum għandha kera ta’ mitejn u tletin ewro fis-sena, iżda tgħix fi propjetà li tiswa tliet mitt elf ewro. Xi tfisser? Ifisser li l-bord tal-kera jista’ jtella’ dik il-kirja għal sitt elef ewro fis-sena. Mur għidli kif pensjonant jista’ jħallas sitt elef ewro fis-sena. Id-differenza bejn mitejn u tletin ewro fis-sena u sitt elef ewro fis-sena se nħallsuha kollha lis-sid. Dik hija l-kobor ta ‘din ir-riforma, Sur President, u jekk il-kera titla’ sa għaxart elef ewro fis-sena, id-differenza titħallas kollha kemm hi li sied. Dan huwa l-kobor ta’ din ir-riforma.”
Dr Abela qal li mhux se jinsa lanqas min jaħdem u qiegħed f’kirja ta’ qabel l-1995: “Se nipproteġu wkoll lil dawk li jaħdmu iva. Lil persuna li taħdem iva ngħidulu li ma jistax iħallas aktar minn ħamsa u 20% tad-dħul tiegħu d-differenza bejn ħamsa u għoxrin fil-mija tad-dħul tiegħu sal-ammont miżjud tiegħu fil-kera hemmhekk inħallsuha aħna wkoll sa massimu ta’ għaxart elef ewro sena.”
Il-Prim Ministru Robert Abela qal kif il-Gvern ikkonsulta ma’ diversi għaqdiet u partijiet involuti li lkoll faħħru r-riforma mressqa mill-Gvern filwaqt li l-Oppożizzjoni baqgħet iżolata fit-tmaqdir.
Intant qabel id-diskors tal-Prim Ministru, waqt din is-seduta parlamentari tkellem ukoll il-Ministru għall-Akkomodazzjoni Soċjali, Roderick Galdes.
Il-Ministru Galdes qal kif permezz ta’ din il-liġi, il-Gvern qed jindirizza l-problema biex ħadd ma jispiċċa mingħajr saqaf fuq rasu.
Semma kif din hija l-ikbar liġi f’dan il-qasam fl-istorja ta’ pajjiżna.
