“Irridu ninvestu fil-futur u nsaħħu l-preżent.”
Dan kien il-messaġġ ewlieni tal-Prim Ministru u Mexxej Laburista Robert Abela waqt diskussjoni li kellu maż-żgħażagħ fl-MCAST.
Hawnhekk huwa spjega bosta proposti mill-Manifest Elettorali tal-Partit Laburista, anke dawk li jolqtu liż-żgħażagħ b’mod dirett, fejn saħaq li dawn kollha għandhom l-għan li jtejbu l-kwalità tal-ħajja tan-nies.
Dr Robert Abela ġie mistoqsi wkoll bosta mistoqsijiet mill-istudenti preżenti, fosthom waħda dwar l-istudji vokazzjonali.
Fl-MCAST huwa spjega kif dan il-Gvern jemmen fix-xogħol tal-id, għax kull ma jmur dan qed joffri għexieren ta’ xogħlijiet ġodda f’pajjiżna u għalhekk, jekk jingħata l-fiduċja, Gvern Laburista ġdid se jibqa’ jsaħħaħ dan il-qasam, fosthom billi jwaqqaf istitut ġdid tas-snajja’.
Qal, “Ejja nireallizzaw dawn l-opportunitajiet ġodda f’setturi li sa ftit tas-snin ilu anqas konna noħolmu bihom fil-pajjiż li qed joħolqu tant niċeċ ġodda li fihom nistgħu nimirħu u nerġa’ naċċenna għall-importanza tax-xogħol tal-id, jekk hux qed nitkellmu marittimu, avjazzjoni u d-diversi setturi li għandna bżonn aktar riżorsa umana li teħtieġ it-taħriġ speċjalizzat fejn hemmek ukoll aħna se nkunu qed nibqgħu ninvestu. ”
Il-Mexxej Laburista ġie mistoqsi wkoll dwar temi oħra bħas-saħħa sesswali, l-arti u l-kultura u anke fuq il-ġurnaliżmu.
Hawnhekk huwa qal kif fil-Manifest Elettorali hemm proposti konkreti li se jkomplu jinċentivaw u jsaħħu dawn l-oqsma.
Il-Prim Ministru aċċenna li l-Partit Laburista jemmen fiż-żgħażagħ u għalhekk se jaħdem qatigħ sabiex isseħħ riforma elettorali oħra li tkun xhieda ta’ dan.
Qal, “Rajna meta jkollna l-Parlament taż-żgħażagħ, ikunu fost l-aqwa seduti li jkollna anke meta tikkumparahom mal-Parlament tradizzjonali, il-maturita tas-suġġetti u tad-diskussjoni li jien nara waqt il-paralment taż-żgħażagħ hija xi ħaġa li tikkonvinċini kemm din hija the right way forward u ejja ħalli din ir-riforma elettorali nwettquha flimkien u din tkun l-aħħar elezzjoni li fiha ż-żgħażagħ ta’ sittax u sbatax-il sena ma jkunux jistgħu jikkontestaw bħala kandidati.”
Il-qasam ambjentali ingaħata importanza fid-diskussjoni organizzata mill-Kunsill tal-Istudenti fl-MCAST, fejn Robert Abela semma l-investiment propost ta’ seba mitt miljun ewro għal aktar spazji miftuħa u ħodor fil-lokalitajiet tagħna.
Iż-żgħażagħ tkellmu wkoll dwar il-proposta ta’ li fost l-oħrajn se tara liż-żgħażagħ jieħdu għaxart elef ewro f’għaxar snin sabiex ikunu jistgħu jixtru l-ewwel propjetà tagħhom.
Intant, f’messaġġ pożittiv li wassal fl-għeluq tad-diskussjoni, il-Prim Ministru qal kif il-Partit Laburista se jibqa’ jinvesti u jiddjaloga maż-żgħażagħ, għax huma l-futur ta’ Malta Flimkien.
Qal, “Urejna fl-aħħar snin u rridu nuru fis-snin li ġejjin illi iva rridu nibqgħu dak il-moviment li l-aktar riforma fis-soċjetá tagħna, mhux talli ma nibżgħux minnhom talli nkunu aħna katalisti għalihom, aħna moviment li għandu l-għatx għar-riformi. Għalhekk nitlobkom biex fis-26 ta’ Marzu tisilfuni l-fiduċja tagħkom, ejja ħalli naħdmu flimkien għandi fiduċja sħiħa fl-abbilitajiet tagħhkom, ejja ħalli nkunu aħna flimkien li nibnu l-futur ta’ dan il-pajjiż, għalhekk Malta, għalhekk flimkien, għalhekk il-futur sabiħ u l-futur nideterminawh kollha kemm aħna.”
