“Il-Partit Laburista għandu bieb miftuħ għall-ideat”.
Hekk saħaq il-Prim Ministru u Mexxej Laburista Robert Abela lejn it-tmiem ta’ indirizz li bih fetaħ business breakfast organizzat mill-Partit Laburista bħala parti mill-attivitajiet marbuta mal-Konferenza bit-tema ‘Inġeddu Malta Flimkien’.
Lill-imsieħba soċjali preżenti u nies minn kull tessut tas-soċjetà, il-Prim Ministru saħaq li hu u l-partit li jmexxi jrid jisma’ mingħand in-nies.
Qal, “Se nibqgħu l-forza politika li tisma’, tifhem u taġixxi b’umiltà sabiex intejbu dan il-pajjiż. Għalhekk qed niffukaw fuq kwalità ta’ ħajja aħjar għal kulħadd fil-politika tagħna. Għax l-għan politiku tagħna hu li Inġeddu Malta Flimkien.”
Dr Abela qal li anki jekk kellu impenji barra minn Malta, peress li ried jattendi għal-laqgħa tal-mexxejja tal-istati membri fil-Mediterran, se jkun qed jattendi kemm jista’ jkun sessjonijiet fejn jisma’ mingħand nies differenti fosthom trejdunjonisti, nies fin-negozju, l-għalliema, il-kunsilliera, l-infermiera, il-ħaddiema tal-id u l-professjonisti u fuq kollox iż-żgħażagħ.
Il-Prim Ministru saħaq li dan il-Gvern, għall-ewwel darba nefaq aktar minn biljun ewro fuq benefiċċji soċjali u saħaq li aħna llum qegħdin hawn biex dik in-nefqa nsarrfuha f’riżultat permezz ta’ tiġdid fil-ħidma politika tagħna.
Spjega, “Iżda, il-mistoqsija li rridu nwieġbu llum hi kif se nġeddu l-politika tagħna biex minn dik in-nefqa, li diġà qed trendi ħafna, ikollna ġenerazzjonijiet ġodda li jekk il-ġenituri tagħhom iddependew fuq il-benefiċji huma jitilqu jiġru.”
Il-Prim Ministru saħaq li rridu nistaqsu x’tiġdid irridu għall-pajjiżna fosthom fil-qasam edukattiv u ambjentali.
Dwar l-aħħar qasam semma l-Pjan ta’ Rkupru ta’ Malta approvat mill-Kummissjoni Ewropea wara ż-żjara uffiċjali ta’ Ursula von der Leyen.
Saħaq li l-ambjent u r-riforma diġitali se jkunu fuq quddiem nett.
Dan qalu fil-kuntest li l-Ħamis, f’konferenza tal-aħbarijiet fil-Barrakka ta’ Fuq, il-President tal-Kummissjoni Ewropea qalet li l-Pjan li ressaq il-Gvern Malti huwa fost l-iktar ambizzjużi fuq l-ambjent fuq l-istati membri kollha tal-Unjoni Ewropea.
Dwar l-edukazzjoni qal li rridu naraw l-ekonomija tagħna tikber fejn insaħħu lill-uliedna fuq suġġetti ta’ xjenzi, Teknoloġija, Inġinerija u Matematika, dawk magħrufa bħala suġġetti STEM.
Il-Mexxej Laburista qal li l-fatt li Malta kienet fost l-iktar pajjiżi effettivi fid-dinja biex affaċċjajna pandemija, dik minnha innifisha hija bażi soda li fuqha nistgħu nġeddu lil dan il-pajjiż flimkien.
Fl-MFCC f’Ta’ Qali semma wkoll il-Budget li se jippreżenta l-Gvern fil-11 t’Ottubru u qal kif il-ħsibijiet tan-nies wara li nkunu ħabbatna l-ideat ma’ kulħadd, se jkunu riflessi fil-Budget.
Qal, “Irrid ngħid li bħala Gvern għandna ħsibijiet ċari ta’ fejn qed nieħdu lil dan il-pajjiż għal li ġej. Imma rridu nisimgħu iktar u rridu nħabbtu l-ideat ma’ kulħadd. Għalhekk flimkien.”
