Il-Prim Ministru Ingliż Keir Starmer ħabbar li l-Ingilterra kienet se tiġġieled għall-paċi fl-Ewropa hekk kif iddikjara żieda fin-nefqa kapitali għad-difiża li se jkun qed ipatti għaliha bi tnaqqis mill-baġit allokat għall-għajnuna umanitarja internazzjonali.
Din il-mossa, jumejn biss qabel huwa skedat li jiltaqa’ ma’ Donald Trump, qajmet tħassib li Starmer kien qed jiżfen għall-mużika tal-President Amerikan kif ukoll ġabet rabja minn gruppi umanitarji li sostnew li dan potenzjalment se jfisser it-telf ta’ ħajjiet ta’ nies li jgħixu f’pajjiżi li jiddependu mill-appoġġ tar-Renju Unit.
F’dikjarazzjoni li laqtet lil kulħadd b’sorpriża, Starmer ħabbar l-akbar żieda fin-nefqa tad-difiża minn tmiem il-gwerra l-bierda, bil-baġit jiżdied għal 2.5% tal-prodott gross domestiku sal-2027, tliet snin qabel dak ippjanat, u bl-ambizzjoni li jilħaq 3%.
Ministri fil-kabinett kienu fost dawk li urew tħassib dwar il-pjan li se jsir tnaqqis ta’ 40% fl-infiq għall-għajnuna umanitarja, wara li għamel l-istess Trump fil-baġit Amerikan.
Waqt konferenza tal-aħbarijiet f’Downing Street, Starmer qal li din ma kinitx deċiżjoni li xtaq jieħu bħala Prim Ministru Laburist Ingliż, iżda hija neċessarja li tittieħed sabiex tiġi assigurata s-sigurtà u d-difiża tal- pajjiż.
Mexxejja Ewropej kienu xxukjati bl-atteġjament ostili ta’ Trump lejn l-Ukrajna fl-aħħar ġimgħat speċjalment meta għajjar lil Zelensky traditur u appoġġja lir-Russja minkejja l-invażjoni brutali li wettqet. Iżda, il-Prim Ministru Ingliż ċaħad li żied in-nefqa fid-difiża minħabba pressjoni minn Trump.
