Il-Prim Ministru Robert Abela ħabbar li, fl-aħħar jiem, il-Kabinett approva żewġ skemi maħsuba biex jgħinu n-negozji jagħmlu l-qalba lejn l-enerġija rinnovabbli u s-sostenibbiltà.
Dr Abela kien qed jitkellem waqt it-tnedija ta’ programm ta’ ċelebrazzjonijiet li jimmarkaw il-175 anniversarju mit-twaqqif tal-Kamra tal-Kummerċ.
Il-Prim Ministru qal li, din is-sena, il-Gvern se jintroduċi proposta leġiżlattiva għal dritt bażiku ta’ kont tal-bank għas-self-employed u n-negozji, kif ġie mwiegħed fil-manifest elettorali tal-Partit Laburista, ‘Malta Flimkien’.
Dr Abela qal li l-Gvern irid iħares lejn sistemi biex tinqata’ l-burokrazija sabiex jiġu ffaċilitati l-investiment u l-kummerċ.
Il-Prim Ministru tkellem dwar il-fiduċja li qed juru n-negozji minkejja żminijiet ta’ sfidi internazzjonali.
“Tersqu ’l quddiem b’ideat u proposti, li għalkemm jinbtu mill-aspirazzjoni tagħkom bħala imprendituri, ikunu ta’ fejda wkoll għal pajjiżna. B’mod konsistenti l-messaġġ li tibagħtuli jkun, ‘Ħalluna naħdmu, offrulna s-serħan il-moħħ u ħallu f’idejna biex inkomplu noħolqu l-ġid’. Ir-risposta tiegħi għal dan dejjem tkun li tistgħu sserrħu raskom minn gvern li jibqa’ jieħu d-deċiżjonijiet biex joħloq l-aqwa ambjent li fih tikbru u tħaddmu iktar nies. Iżda, inżid li l-ġid irridu noħolquh ukoll fil-prijoritajiet il-ġodda tal-pajjiż u b’mod li jindirizza r-realtajiet tal-lum.”
Dr Abela spjega li miexi x-xogħol fuq sistema li tiffaċilita l-proċessi tad-diliġenza dovuta filwaqt li jibqgħu robusti u b’saħħithom.
“Miexi x-xogħol ukoll għal sistema li tiffaċilita l-proċessi tad-due diligence, filwaqt li dawn jibqgħu robusti u b’saħħithom. Anke d-dipartimenti tal-Gvern iridu jitkellmu aħjar ma’ xulxin. Qed naraw li, sas-sena d-dieħla, jibda jkollna l-ewwel riżultati konkreti bbażati fuq konsultazzjoni magħkom u msieħba oħra.”
Dr Abela iddeskriva lill-Kamra tal-Kummerċ bħala sieħeb strateġiku importanti, u rrimarka li membri tal-Kamra jersqu ’l quddiem b’ideat u proposti li jikkontribwixxu għat-tkabbir ekonomiku ta’ pajjiżna.
Il-Prim Ministru ta s-serħan il-moħħ li l-Gvern se jibqa’ jkun spalla u jagħti ċ-ċertezza u l-istabbiltà biex f’pajjiżna jibqa’ jkollna l-aqwa ambjent li fih jibqgħu jikbru n-negozji, waqt li s-settur tax-xogħol ikompli jissaħħaħ.
Dan qiegħed isir meta pajjiżna jiffoka fuq prijoritajiet ġodda, fosthom l-ambjent u l-qalba diġitali.
Dr Abela qal li l-Gvern irid jagħmel bidliet ġodda, fosthom li l-ekonomija ta’ pajjiżna ssir aktar diġitali u ma jkollhiex impatt negattiv fuq il-klima. Fl-istess waqt, il-Gvern se jibqa’ jagħti sostenn qawwi fejn meħtieġ.
“L-istabbiltà fil-prezzijiet tal-enerġija u tal-fjuwil, flimkien ma’ derogi li ksibna fuq livell Ewropew biex il-konsum tal-elettriku jibqa’ għaddej mingħajr xkiel, fissru serħan il-moħħ għalikom in-negozji, fosthom dawk fil-qasam tal-esportazzjoni u dawk li jiddependu mill-konsum tad-dawl. U meta jkun hemm min jipprova jdaħħal id-dubju dwar is-sostenibbiltà, jien inwieġeb b’mod ċar ħafna: l-unika politika li mhix sostenibbli hi dik tal-awsterità. Quddiem l-isfidi internazzjonali, l-istituzzjonijiet internazzjonali kollha jaqblu li l-ekonomija tagħna se tkompli tikber b’mod sostnut għax kellna l-kuraġġ nieħdu d-deċiżjonijiet korretti.”
Il-Prim Ministru Robert Abela rrefera għall-programmi operattivi marbutin mal-fondi Ewropej, li jammontaw għal €2.2 biljun, li nnegozja l-Gvern u li tħabbru nhar it-Tnejn li għadda.
Huwa sostna li l-Gvern se jibqa’ jinvesti fl-infrastruttura diġitali u fis-settur edukattiv filwaqt li jkompli jaqta’ l-burokrazija biex ikompli jiġi faċilitat l-investiment u l-kummerċ.
Il-Prim Ministru awgura lill-Kamra tal-Kummerċ, li dalwaqt se tgħaddi minn proċess ta’ għażla ta’ tmexxija ġdida, u qal li huwa ħerqan li, flimkien mal-Gvern, jibqa’ jkollha interess komuni favur Għawdex u Malta.
“Għaż-żmien li ġej nixtiqielkom aktar ħidma sfieqa. Bħala Gvern, lilna se tibqgħu ssibuna ta’spalla li tagħti ċ-ċertezza u l-istabbiltà biex ikompli jinħoloq il-ġid li bih nibqgħu nsostnu lil Malta, pajjiż li għandu futur sabiħ.”
