“L-għażla fit-8 ta’ Ġunju hija waħda għal leħen ikbar u iktar għodda liċ-ċittadini.” Dan kien il-messaġġ b’saħħtu tal-Prim Ministru u Mexxej Laburista Robert Abela waqt diskussjoni politika li ttellgħet f’Wied il-Għajn u li għaliha attendew numru sabiħ ta’ persuni.
Attività li involviet ukoll bosta kelliema li, flimkien, iddiskutew suġġetti varji li jduru mat-tema ewlenija – il-kunsilli lokali.
Fil-fatt, Dr Abela rrimarka wkoll il-ħidma li saret fl-aħħar snin, permezz ta’ kunsillieri Laburisti, biex illum għandna lokalitajiet isbaħ u li fihom saru numru ta’ proġetti importanti permezz ta’ diversi skemi tal-Gvern.
Dr Abela tenna wkoll l-importanza ta’ xogħol fis-snin li ġejjin favur l-estetika, l-ambjent, l-indafa, is-sigurtà u l-anzjanità, fost oħrajn.
Intant, il-Prim Ministru fakkar kif ftit aktar minn ġimagħtejn biex il-poplu jmur jivvota għal dawn l-elezzjonijiet, il-Partit Nazzjonalista għadu lanqas biss ippreżenta programm elettorali għall-elezzjoni tal-Parlament Ewropew.
“Tmienja u sittin lokalità, 68 manifest, mela titkellem bil-baħħ man-nies. Manifesti li se jkunu qed jaslu fir-residenzi tagħkom u mill-banda l-oħra Partit Nazzjonalista li ma tafx fejn qiegħed miegħu, imkien fl-ebda waħda mil-lokalitajiet tagħna.”
Il-Prim Ministru Robert Abela
Dwar is-settur tal-kostruzzjoni, il-Prim Ministru Robert Abela sostna kif is-sotto-kumitat tal-Kabinett responsabbli mill-implimentazzjoni tar-rakkomandazzjonijiet tal-Inkjesta Jean Paul Sofia, iddiskuta kif il-kunsilli lokali f’pajjiżna għandu jkollhom vuċi akbar fir-riforma li għaddejja bħalissa.
Fil-fatt, il-Prim Ministru sostna kif, sa din il-ġimgħa, f’livell ta’ Kabinett ġiet approvata riforma ġdida – dik tat-tisħiħ tal-Uffiċċju tal-Ombudsman, biex b’hekk jiddaħħal fid-dekasteru tal-Kummissarju tal-Ippjanar fi ħdan l-istess uffiċċju, is-settur tal-kostruzzjoni.
“Tajna timeline speċifiku, li sakemm naġġornaw bħala Parlament għall-vaganzi tas-sajf, dak l-abbozz ikun liġi u mhux biħsiebni naġġorna l-Parlament qabel dak l-abbozz iseħħ u jkun ittrasforma ruħu f’liġi ġdida, li tixraq, biex nipproteġu s-saħħa u s-sigurtà u l-ħajja tal-ħaddiema kollha li jaħdmu fuq il-lantijiet tax-xogħol ukoll u kull min hu impattat b’xogħlijiet li qed isiru.”
Il-Prim Ministru Robert Abela
B’hekk, il-Prim Ministru temm id-diskors tiegħu jappella biex il-poplu jkompli jappoġġja l-kandidati kollha tal-Partit Laburista.
“Lil dawk kollha, li tafu li għadhom mhux konvinti sa issa jekk għandhomx jivvotaw fit-8 ta’ Ġunju, ikkonvinċuhom jiġbru d-dokument tal-vot, ressquhom lejna ħa nidentifikaw x’inhuma d-diffikultajiet tagħhom u nassistuhom u nsibulhom is-soluzzjonijiet.” Fit-8 ta’ Ġunju kruċjali nivvutaw għall-kandidati kollha tal-Partit Laburista għall-elezzjonijiet tal-Kunsilli Lokali, għall-kandidati kollha tal-Partit Laburista għall-elezzjonijiet tal-Parlament Ewropew ħalli nkomplu nagħtu s-saħħa lill-Maltin, is-saħħa lill-Għawdxin u s-saħħa lill-Iskalin.”
Il-Prim Ministru Robert Abela
