Fl-Imsida, il-Prim Ministru rrefera wkoll għall-iktar gidba riċenti dwar il-familja tiegħu. “Din il-ġimgħa nsib miktub minn membru tal-Oppożizzjoni li ħareġ jgħid li t-tfal tal-Prim Ministru qed imorru skola privata fl-Ingilterra fejn qed jonfqulu €65,000 f’tution fees”, spjega l-Prim Ministru li qal kif dan qagħad fuq tagħrif ta’ kont anonimu.
“Dan il-bravu minflok iċċekja l-affarijiet ħadha bħala fatt u ħareġ jattakka. Kelli noqgħod inwieġeb li mhux veru jmorru skola l-Ingilterra, u li m’hemm ebda ħsieb li jmorru skola l-Ingilterra. Bħal mijiet u eluf ta’ ġenituri ddeċidejt li nibgħathom skola privata u nagħmel is-sagrifiċċju”, spjega Joseph Muscat.
Iddeskriva dan bħala eżempju ieħor għaliex il-Kap tal-Oppożizzjoni għandu bżonn jieħu grip tas-sitwazzjoni. “Għax affarijiet hekk m’għandhomx ikunu aċċetabbli. Hemm linja ċara ħafna bejn il-ħajja privata u politika. U hi x’inhi aħna l-ħajja privata ma nidħlu fiha xejn. Ma jinteressanix u mhux se ngħamlu hekk,” qal il-Prim Ministru.
“Jekk xejn, lil min ikollu problema fil-ħajja privata nieqfu miegħu. Nagħmlu hekk għax dan hu s-sens komun tal-familji Maltin u Għawdxin. Huma biss il-ftit li din is-sensibbiltà ma jifmuhiex,” qal il-Prim Ministru. B’referenza għall- rapporti fil-midja dwar il-kumpanija 17 Black, il-Prim Ministru kien ċar. “L-ewwel nett jien qed nifhem li din l-informazzjoni ġiet minn investigazzjonijiet li qegħdin isiru milll-awtoritajiet Maltin. L-ewwel konklużjoni tiegħi hi mela qed isiru l-investigazzjonijiet. Mela mhux vera dak li kien qed jintqal li l-awtoritajiet Maltin ma jinvestigawx. It-tieni ħaġa jien nistenna li l-affarijiet jiġu investigati mill-awtoritajiet kollha” qal il-Prim Ministru inkluż il-Maġistrat li marret għandu l-Oppożizzjoni.
Meta investiga l-Maġistrat sab li kienu gideb “Kif joħorġu l-konklużjonijiet jien nieħu l-azzjonijiet. Ma dejjaqtx nieħu azzjonijiet qabel ma niddejaqx nieħu azzjonijiet wara. Dan huwa l-mod serju kif isiru l-affarijiet. Anke għaliex fil-passat kellna affarijiet li ntqalu li wara nstab li ma kienux veri,” qal Joseph Muscat.
“Imma jekk l-Oppożizzjoni trid timxi bil-kejl li jekk issir allegazzjoni jrid ikun hemm riżenja, tajjeb li jibdew jimxu bl-eżempju huma. Jekk saret allegazzjoni fuq David Casa jien nistenna li biex David Casa jkun kredibbli, jirriżenja llum, qabel ma jitlob lil ħaddieħor jirriżenja.
Is-sur Casa ġustament qed jgħid li hemm investigazzjoni tal-Uffiċċju Ewropew kontra l-frodi u nħalluh jiddeċiedi. Sewwa qed jgħid, jekk hemm allegazzjoni kontrih nistennew l-investigazzjoni tiġi investigata. Imma ma jistax jgħid li fil-każ tiegħi nistennew u fil-każ ta’ ħaddieħor ma nistennewx,” qal il-Prim Ministru li fakkar kif il-Kap tal-Oppożizzjoni għandu akkuża għar.
“Il-Kap tal-Oppożizzjoni għandu mdendla fuq rasu akkuża li kien qed jaħsel il-flus tal-kriminalità. Mhux qed ngħidha jien. Allura bl-istess kejl il-Kap tal-Oppożizzjoni qabel imur jagħmel il-press conferences ngħidlu jirriżenja? L-inqas wieħed li rridu jirriżenja, għandu iktar madwaru li jridu jirriżenja. Imma ngħidlu li biex tkun kredibbli itlob investigazzjoni fuqek innifsek,” qal Muscat li fisser kif hu kellu jistenna iktar minn sena biex in nies ingħataw ir-raġun li qagħdu fuq kelmtu.
“Bl-istess mod, il-Kap tal-Oppożizzjoni, l-iktar ħaġa ovvja li għandu jagħmel hi li jmur għand maġistrat jaqbad l-allegazzjoni kontrih, id-dokumenti li ġew preżentati kontrih u jgħid għamlu investigazzjoni fuqi. Hemm tista’ tkun kredibbli,” qal Muscat.
Tenna li l-gvern se jkompli miexi biex jagħmel il-pajjiż l-aqwa fl-Ewropa. “Fejn mhux biss noħolqu l-ġid imma nkomplu nkattruh,” qal il-Prim Ministru.
