Fi stqarrija l-Partit Laburista nnota r-rapport ewlieni tal-Kummissjoni Elettorali dwar il-konfini tad-distretti elettorali li tqiegħed ilbieraħ fuq il-mejda tal-Kamra tad-Deputati. Il-Partit Laburista qabel mar-reviżjoni u t-tibdil fil-konfini tad-distretti elettorali, skont kif propost fir-rapport ewlieni tal-Kummissjoni Elettorali.
Intqal li t-tibdil propost fir-rapport ewlieni tal-Kummissjoni Elettorali sar skont il-provedimenti tal-Kostituzzjoni, jiġifieri t-tibdil jirrispetta l-elementi tal-viċinanza ġeografika u tal-varjazzjoni fid-densità tal-popolazzjoni, kif imqabbla mal-kwota komuni għal kull distrett. Dan sabiex in-numru ta’ eletturi bejn l-ewwel u t-tnax-il distrett ikun jirrifletti l-kwota elettorali.
Il-Partit Laburisa żied jgħid li bit-tibdil propost mir-rapport ewlieni tal-Kummissjoni Elettorali, iċ-ċaqliq propost mill-ewwel sat-tnax-il distrett se jaffettwa mal-21,000 votant. Dan l-ammont jikkuntrasta mat-tibdil propost fir-rapport tal-minoranza, jiġifieri tal-membri tal-Partit Nazzjonalista fil-Kummissjoni Elettorali, għax in-numru ta’ votanti affettwati huwa ta’ madwar 186,000 persuna.
Dawn iċ-ċifri jxejnu l-kritika li qed issir mill-Partit Nazzjonalista, li saħansitra qed jgħid li mhux se jivvota favur dawn it-tibdiliet proposti, għax skontu se ‘jdgħajfu’ l-lokalitajiet. Il-Partit Nazzjonalista qed jikkontradixxi wkoll dak li għamel 4 snin ilu, meta l-proposti ewlenin kienu bbażati fuq l-istess prinċipji u dakinhar ivvota mal-Gvern u kontra r-rapport tal-minoranza, tenniet l-istqarrija.
Il-Partit Laburista temm jgħid li jidher li l-Partit Nazzjonalista qed jiggranfa ma’ kull kwistjoni biex idawwarha f’waħda partiġġjana bit-tama li jipprova jiskorja xi punti politiċi. Din hija prova ċara wkoll ta’ kemm il-Partit Nazzjonalista mhux se jivvota biex iħares l-interessi tan-nies, iżda biex jipproteġi l-interessi tad-deputati u tal-kandidati tiegħu.
