Issa li l-produzzjoni u l-ittestjar tas-software tal-passaport Malti l-ġdid ġew fi tmiemhom, id-dokument tal-ivvjaġġar mistenni jidħol fiċ-ċirkolazzjoni dan ix-xahar.
Il-paġni ta’ ġewwa tal-passaport il-ġdid se juru xbihat ta’ postijiet rinomati f’Malta, folklor u tradizzjonijiet Maltin, li joħorġu s-sbuħija tal-wirt storiku u kulturali Malti. Fost dawn l-immaġini nsibu ċ-Ċittadella f’Għawdex u t-Teatru Manoel.
L-immaġini, li huma kumplessi, flimkien ma’ saff importanti ta’ karatteristiċi ta’ sigurtà, huma stampati b’inka sigura u kienu ddisinjati fil-passaport bil-għan li dan ikun aktar sigur aktar milli sempliċiment għal raġunijiet estetiċi.
Is-Segretarju Parlamentari għar-Riformi, Ċittadinanza u Simplifikazzjoni tal-Proċessi Amministrattivi Julia Farrugia Portelli stqarret li ċ-ċittadini Maltin daqt se jkunu fil-pussess ta’ passaport li jżewwaq il-kultura mal-ivvjaġġar, imma aktar minn hekk, dokument sigur li se jagħmilha ferm diffiċli biex jiġi ffalsifikat.
Julia Farrugia Portelli kompliet telabora dwar is-sigurtà li dan il-passaport se jkun qed joffri, u spjegat kif id-dettalji personali tal-individwu se jkunu mnaqqxa fuq paġna polycarbonate, li se tagħmilha diffiċli mmens biex id-dokument ikun iffalsifikat jew imbagħbas, mingħajr ma jħalli sinjali ovvji.
Is-Sur Anton Sevasta, Kap Eżekuttiv tal-Aġenzija Identità Malta, stqarr li l-ewwel passaporti Diplomatiċi u Aljeni (jinħareġ lill-persuni li jkollhom protezzjoni sussidjarja jew fil-pussess ta’ Specific Residence Authorisation) huma mistennija li jkunu fiċ-ċirkolazzjoni fit-tieni ġimgħa ta’ Novembru, u jekk kemm-il darba ma jinqalgħux diffikultajiet tekniċi, il-ħruġ tal-Passaporti Ordinarji jsegwi fil-ġimgħat ta’ wara.
Il-ħruġ gradwali tal-Passaport Ordinarju l-ġdid Malti se jibda f’dan ix-xahar u se jseħħ fuq numru ta’ snin. Id-dokument il-ġdid tal-ivvjaġġar se jkun qed jinħareġ għal applikazzjonijiet għal passaport ġdid jew tiġdid ta’ passaport mingħajr ebda żieda fil-ħlas preżenti. Il-passaporti li hawn fiċ-ċirkolazzjoni fil-preżent se jibqgħu validi sad-data tal-iskadenza li hemm indikata fuq l-istess dokument. Il-passaporti attwali diġà huma konformi ma’ standards ta’ sigurtà internazzjonali, iżda l-ġodda se jagħmlu użu mill-aktar teknoloġija avvanzata bil-għan li jkun evitat aktar l-iffalsifikar ta’ dan id-dokument.
