“Mill-Gvern, il-Partit Laburista qed ikompli joħloq bidla pożittiva f’ħajjet in-nies. Dan b’kuntrast mal-Partit Nazzjonalista; populist fl-oppożizzjoni li ma joffri ebda soluzzjonijiet.”
Iddikjara dan il-Prim Ministru u Mexxej Laburista, Robert Abela quddiem folla sabiħa ta’ nies li nġabret għal attività politika oħra tal-Ħadd filgħodu u li din il-ġimgħa saret fiċ-Ċentru Ċiviku tal-Mosta.
F’diskors ċar, Robert Abela spjega kif huwa l-obbligu ta’ dan il-Gvern li jara li l-azzjonijiet li jittieħdu dejjem iħarsu l-ġid komuni.
“Xogħli għalhekk illum huwa li nikseb suċċessi ġodda, għalikom u għal uliedkom. Fejn is-suċċess imbagħad iġib miegħu sfidi ġodda, xogħolna se jkun li nitħaddtu magħkom, nidentifikaw il-problemi u sifidi ġodda u għalihom dejjem nirreaġixxu billi noffru s-soluzzjonijiet. Dan ifisser meta ngħid li dan huwa Gvern tan-nies.”
Il-Prim Ministru nnota kif filwaqt li għandek Gvern iffukat biex imexxi ’l pajjiż ’il quddiem, min-naħa l-oħra hemm Oppożizzjoni Nazzjonalista mehdija fil-populiżmu.
“Huwa biss meta tkun moviment pożittiv illi int timxi ’l quddiem, huwa biss meta tkun moviment li jgħaqqad li twassal għall-progress u mhux meta tkun tiġġieled u moħħok biex tifred. Huwa biss meta tkun moviment tas-soluzzjonijiet li tista’ taħdem biex ittejjeb lil pajjiżek mhux meta tkun moħħok biex tħabbar u tkabbar il-problemi. Għalhekk aktar ma jkun hemm firda u negattività u partiġjaniżmu, aktar tikber il-ħtieġa li nkunu gvern tan-nies.”
Il-Prim Ministru semma numru ta’ riformi kruċjali li wettaq jew se jwettaq dan il-Gvern u li anke fuqhom l-Oppożizzjoni, bħal dejjem, qed tkun populista.
Fost l-oħrajn, tkellem dwar il-ħtieġa tal-bidliet, anke jekk uħud minnhom ikunu ibsin. Semma kif din il-ġimgħa fil-Parlament ġew diskussi bidliet li se jagħtu saħħa lill-Awtorità tad-Djar biex tkun aktar iebsa quddiem abbużi, anke permezz ta’ infurzar.
“L-Awtorità tad-Djar issa se jkollha dik l-għodda biex tiżgura li meta xi ħadd jiġi u jirreġistra kuntratt tal-kera, trid tiżgura li ma jkunx hemm iżjed persuni minn dak li skont il-liġi jistgħu jiddaħħlu f’dak l-appartament. Jekk se tkun qed tikser dak ir-regolament il-kuntratt tal-kera tiegħek ma jiġix reġistrat u l-kirja ma tgħoddx u tkun waħda illegali.”
Dwar is-settur turistiku, il-Prim Ministru tenna li l-Gvern irid iżid il-kwalità f’dan is-settur u għalhekk mix-xahar id-dieħel se tiġi introdotta l-Iskills Card.
Meta tkellem dwar il-qasam tax-xogħol, filwaqt li nnota li pajjiżna kiseb rekord ieħor tal-inqas rati ta’ qgħad fl-Unjoni Ewropea, Dr Abela tenna kif l-ammont ta’ Maltin jaħdmu bħala maniġers jew f’karrieri professjonali illum huwa kważi mitt elf. Dan ifisser li minn għaxar impjiegi ġodda li ħadu l-Maltin fl-aħħar għaxar snin, tmienja kienu f’karrieri professjonali.
Robert Abela temm b’messaġġ ċar kif dan se jibqa’ Gvern li jġib l-ewwel, l-interess tan-nies.
“Biex nibqgħu Gvern tan-nies għandna bżonn lil kull wieħed u waħda minkom. Ejjew ħalli ningħaqdu flimkien biex niksbu suċċessi ġodda, biex dan il-moviment jibqa’ dejjem magħqud u rebbieħ. Dan mhux żmien li nibqgħu ċassi, dan huwa żmien li nseddqu s-saħħa tagħna, għax b’hekk biss insaħħu Malta Tagħna.”
Ara wkoll:
