It-Tnejn filgħodu, seduta speċjali tal-Parlament Malti, immexxija miż-żgħażagħ, iddiskutiet żewġ mozzjonijiet li tressqu minnhom u ttrattaw ir-regalorizzazzjoni tal-prostituzzjoni u l-polarizzazzjoni u l-libertà tal-midja f’pajjiżna li maż-żmien ħadet xejra differenti.
Fil-preżenza ta’ membri Parlamentari, iż-żgħażagħ ippreżentaw mozzjoni dwar il-prostituzzjoni f’pajjiżna u kif għandha tiġi regolata. Huma pproponew diversi suġġerimenti, inkluż jekk għandhomx jiġu offruti sessjonijiet ta’ terapija lill-ħaddiema tas-sess, biex f’każ ta’ regolamentazzjoni jsiru spezzjonijiet regolari minn awtoritajiet relatati u kif se jsiru mezzi ta’ protezzjoni f’każ li persuna tkun f’periklu.
Dwar is-suġġett intervjena d-Deputat Laburista Randolph Debattista, li tenna li llum diversi organizzazzjonijiet internazzjonali diġà jirrikonoxxu l-bżonn li l-ħaddiema involuti jiġu protetti.
Qal, “Imma llum ix-xogħol tas-sess mhuwiex kif kien tradizzjonalment u llum fid-diskussjoni ħassejt li qisna konna qed nitkellmu ħafna fuq dak tradizzjonali, li persuna jidħol f’kamra u jagħmel l-att sesswali bħala xogħol. Illum il-ġurnata, dan mar online. Illum hemm OnlyFans u numru ta’ postijiet oħrajn li wieħed irid iżomm f’moħħu meta jiġi biex jitkellem dwar dan is-suġġett.”
Sadanittant Eman Farrugia, membru tal-Kunsill Nazzjonali taż-Żgħażagħ qal li ż-żgħażagħ qegħdin jipproponu li għandu jkun hemm entità governattiva li tirregolarizza dan il-qasam.
Din għandu jkollha r-responsabbiltajiet li tkopri sessjonijiet ta’ terapija obbligatorji mingħajr ħlas lil kull ħaddiema tas-sess. Farrugia qal ukoll li ż-żgħażagħ, flimkien, qegħdin jipproponu li jsiru spezzjonijiet frekwenti fejn ikunu impjegati ħaddiem tas-sess.
Waqt is-seduta tkellem ukoll is-Segretarju Parlamentari għall-Fondi Ewropej, Chris Bonett, fejn faħħar lill-Kunsill Nazzjonali taż-Żgħażagħ għax-xogħol kontinwu tiegħu u tar-riċerka intensiva li għamlu biex din l-edizzjoni oħra tal-Parlament Nazzjonali taż-Żgħażagħ tkun suċċess.
Qal, “Xi ħaġa li rrid nagħmel enfasi fuqha hi l-importanza ta’ dan l-eżerċizzju u hawnhekk irrid insellem lill-Kunsill Nazzjonali taż-Żgħażagħ, li għal snin twal mexxa dan il-Parlament taż-Żgħażagħ u tajjeb li ngħidu forsi hawn uħud minnkom li ma jafux, li minn dan l-eżerċizzju, minn din il-Kamra ħarġu ideat li saru liġijiet.”
