Il-Parlament iddibatta s-settur tal-enerġija wara mozzjoni tal-Oppożizzjoni. Mozzjoni li fost oħrajn titlob il-pubblikazzjoni tal-kuntratti b’rabta mal-impjant tal-gass u ftehimiet oħra fis-settur. Dokumenti li diġà kienu ppubblikati fl-aħħar sigħat u li ċ-ċittadini jistgħu jarawhom billi jidħlu online.
Il-proġett diskuss huwa l-proġett li wassal għal roħs fit-tariffi tal-enerġija u għandu l-barka tal-Kummissjoni Ewropea f’kull aspett tiegħu b’Kummissarji Ewropej differenti jinnotaw l-impatt pożittiv tiegħu u l-mod kif inbena skont ir-regoli kollha Ewropej.
L-enerġija: ‘tariffi orħos, arja aktar nadifa u stabilità u flessibiltà’ – Edward Zammit Lewis
Il-Ministru għar-Turiżmu Edward Zammit Lewis qal li bil-politika tal-Gvern dwar l-enerġija, il-poplu ngħata tariffi orħos, arja aktar nadifa u stabilità u flessibiltà għax il-Gvern għandu minn fejn jagħżel.
Bid-deċizjonijiet li ħa l-Gvern dwar l-Enemalta, l-aġenziji tal-kreditu taw ratings favorevoli. Kieku ma għamel xejn, il-biljun ewro dejn li kellha l-Enemalta kien se jniżżel miegħu lill-banek u lill-pajjiż.
Il-Gvern dejjem qal li kien se jippublika l-kuntratti, sa minn qabel il-publikazzjoni ta’ din il-mozzjoni. Ċerti tagħrif mitlub mill-oppożizzjoni jinsab fuq il-websites tal-parlament, tal-Enemalta jew huwa kuntratt pubbliku. Fil-każ tal-Maltco, ta’ Liquigas u l-MIA il-Gvern nazzjonalista ma ppublika xejn.
Bit-tariffi orħos, il-lukandi ta’ erba’ u ħames stilel iffrankaw 4.5 miljun ewro li użaw biex isebbħu l-istess lukandi
Bid-deċizjoni tal-gvern, qal il-Ministru Zammit Lewis, il-konsumatur għandu ambjent aħjar.
Anthony Agius Decelis iffoka l-aktar fuq il-fatt li bir-roħs tat-tariffi, il-Maltin u l-Għawdxin qed jibqgħalhom 80 miljun ewro fil-but kull sena.
Il-poplu qed igawdi qabża fil-kwalità minħabba l-politka tal-enerġija ta’ dan il-Gvern – Josè Herrera
Il-Ministru Josè Herrera qal li bil-politka tal-enerġija ta’ dan il-Gvern, l-Awtorità Ambjentali għalqet darba għal dejjem l-era tal-heavy fuel oil (HFO) u saħħet il-garanzija li l-kontijiet se jibqgħu orħos. Il-permess għall-power station il-ġdida ġiet approvat bi tmien voti favur u wieħed kontra. Mhux biss ivvutaw favur rappreżenatnti tal-gvern iżda anke dawk ta’NGOs ambjentali, fosthom il-Professur Deidun.
L-Oppożizzjoni kienet waħedha u trid tibqa’ waħedha għax topponi l-qalba mill-HFO għall-gass.
Il-Ministru Herrera qal li li kieku kien għall-Oppożizzjoni il-power station tal-Marsa ma għalqietx. Illumk, minn ras għal ras, l-emissjonijiet ta’ carbon dioxide huwa ta’ 7.8 tunellata – ferm inqas minn dak stabbilit mill-UE.
Aktar għajjat minn argumenti raġunati – Edward Scicluna
Il-Ministru għall-Finanżi Edward Scicluna qal li l-argumenti li qed iġġib l-Oppożizzjoni kontra l-politika tal-Gvern dwar l-enerġija kien aktar għajjat minn argumenti raġunati u dan hu motivat għax id-deċizjonijiet ħżiena li ħa l-gvern Nazzjonalista f’dan is-settur swewh l-elezzjoni.
Kemm dam Ministru Austin Gatt, it-tariffi ttripplaw u l-pajjiż niżżluh għarkubtejh. L-amministrazzjoni Nazzjonalista tilfet l-opportunità li tgħaqqad lil Malta mal-pajp tal-gass ewropew għax kien hemm min kellu l-interess li jkompli juża l-HFO.
Il-Partit Laborista għamel it-tnaqqis tat-tariffi bħala l-bażi tal-aġenda ekonomika tiegħu għax ma jistax iħalli lil alta bl-ogħla tariffi fl-Ewropa.
Il-Prof. Scicluna qal li waqt li kien veru li l-gvern ħareġ garanzija bankarja lil ElectroGas li ma kinitx tas-soltu iżda fakkar li n-Nazzjonalisti wkoll użaw metodi mhux tas-soltu biex iffinanzaw il-bini tal-Parlament u biex iħallas id-dejn fuq Delimara 1.
Kif ikkonfermat il-Kummissjoni Ewropea ix-xahar li għadda dil-kwalità ta’ għajnuna statli hija permissibbli u l-gvern ħadem qabel id-deċizjoni tal-kummissjoni għax ma riedx jaħli ħin.
Il-Prof Scicluna qal li l-proġett sab ukoll l-approvazzjoni tal-aġenziji tal-kreditu għax hu intiż biex jindirizza l-ħtiġijiet tal-pajjiż u jraħħas il-kontijiet.
Qal li l-Enemalta, li qabel kienet meqjusha bħala “junk bond”, bdiet tagħmel il-qligħ. Hawnhekk qamet Marlene Farrugia li talbitu jikkjarifika. Il-Ministru qal li dan jagħmlu fil-mument opportun iżda wieħed jista’ jara fuq liema bażi Standard & Poors għollew ir-ratings tal-Enemalta.
Atteġjament li jitfa’ dubju fuq xogħol il-Kummissjoni Ewropea – Chris Cardona
Il-Ministru Chris Cardona qal li hemm sitt aspetti li wieħed għandu jżomm f’moħħu meta jitkellem dwar il-mozzjoni tal-Oppożizzjoni. Dawn huma l-benefiċċji ambjentali, kontijiet orħos, is-sigurtà tal-provvista, l-għażla tad-distribuzzjoni, il-pipeline futur bejn Malta u Sqallija, l-approvazzjoni tal-Kummissjoini Ewropea li tfisser trasparenza u lp-fatt li l-gvern salva lill-Enemalta.
Huwa qal li l-atteġġament tal-Oppożizzjoni kien wieħed ta’ diżappunt għax jitfa’ dubbju jekk il-Kummissjoni għamlitx xogħlha.
Cardona qal li mhux minnu li l-industrija qed ikollha ġġorr piz minħabba l-enerġija iżda r-roħs fit-tariffi fissru injezzjoni ta’ 50 miljun ewro fl-industriha.
Il-flus li kien hemm fil-korruzzjoni issa qed imorru għal inizjattivi soċjali – Evarist Bartolo
Il-Ministru tal-Edukazzjoni Evarist Bartolo faħħar l-effetti tal-politika tal-gvern fl-enerġija fuq l-edukazzjoni u x-xogħol. Qal li l-flus li kien hemm fil-korruzzjoni issa qed imorru għal inizjattivi soċjali. Għalhekk Malta qed minn ta’ quddiem nett fil-lista ta’ kemm nofqu mill-Prodott Nazzjinali Gross fuq l-edukazzjoni. Illum il-ġid qed jitqassam aħjar.
Kieku l-Enemalta kienet għadha l-mazzra li kienet fl—2013 kieku ma kienx jista’ jsir l-investiment fl-edukazzjoni u lkwalità tal-ħajja li qed igawdu l-Maltin illum ma kinitx tkun possibbli.
L-attitudni negattiva tal-Oppożizzjoni hija riflessjoni tal-fatt li tilfet kull sens ta’ raġuni u llum il-Partit Nazzjonalista huwa maqgħud biss bis-sens ta’ mibgħeda li għandu lejn l-amministrazzjoni Laburista.
Penali ta’ €10m jekk il-power station ma titlestiex fil-ħin – Konrad Mizzi
L-Enemalta imponiet penali ta’ €10 miljun fuq l-Electrogas jekk il-power station il-ġdida ma titletiex fil-ħin miftehem.
Meta kien qed jitkellem fid-dibattitu dwar il-mozzjoni tal-Oppożizzjoni, il-Ministru Konrad Mizzi qal li l-kuntratt jinkludi klawsoli li jissalvagwardjaw lill-korporazzjoni jekk ikun hemm difetti li jintebħu bihom anke wara s-snin. Sa issa l-Electrogas diġa’ ħallset €30 miljun lill-Enemalta.
Meta l-Ministru qam jitkellem l-Oppożizzjoni telqet ’l barra.
Dr Mizzi qal li l-qalba għal gass se tfisser arja iżjed nadifa, inqas emissjonijiet, tariffi orħos u provissta adekwata u minn sorsi differenti. Tfisser ukoll li l-power station tal-Marsa u l-parti l-qadima tal-power station ta’ Delimara jingħlaqu.
Il-Ministru Mizzi qal li jekk jitneħħa t-tanker tal-gass minn Marsaxlokk kif qed tgġid li se tagġħmel l-Oppożizzjoni, il-power station ma jkollhiex provvista biżżejjed u dan iwassal għal qtugħ fil-provista tal-elettriku.
Huwa qal li l-prezz tal-elettriku li l-Enemlata se tixtri mingħand Electrogas huewa garantut għal ħames snin, indipendentament minn dak li jkun barra minn Malra. Wara jkun skont il-prezzijiet internazzjonali.
L-Enemalta se jkollha d-dritt li tixtri l-elettriku mil-liema power station ta’ Delimara trid u mill-interconnector.
Dr Mizzi qal li sa l-aħħar tax-xahar nofs il-power statio0n tal-BWSC tkun qed taħdem bil-gass u n-nofs l-ieħor jingħalaq u jiġi konvertit.
Huwa spjega kif il-ftehim max-Shanghai Electric, li nvestiet €300 miljun fl-Enemalta, kien salva lill-korporazzjoni u naqqsilha d-djun bin-nofs. Riżultat ta’ dan, Standard & Poors għollewha l-credit rating.
Il-vot fuq emenda li ressaq il-Ministru Mizzi għall-mozzjoni oriġinali, kif ukoll fuq il-mozzjoni Nazzjonalista, jittieħdu l-Erbgħa, 1 ta’ Marzu.
