Illum, Membri Parlamentari fir-Renju Unit se jkunu qed jivvotaw dwar l-abbozz li tillegalizza l-mewt assistita, suġġett kontroversjali li pprovoka qasma fil-lealtajiet tal-partiti tradizzjonali.
Il-leġislazzjoni, li kienet ġiet introdotta inizjallment mill-Membru Parlamentari tal-Partit Laburista Kim Leadbeater, tippermetti lill-persuni adulti li baqalhom anqas minn sitt xhur ħajja, li jingħataw il-faċilità tal-ewtanażja wara li jiksbu approvazzjoni minn żewġ tobba u mħallef.
Il-vot qed jiġi meqjus bħala wieħed ta’ kuxjenza, li jfisser li l-Membri Parlamentari m’għandhomx jivvutaw skont il-linji gwida tal-partit tagħhom iżda ingħatalhom vot ħieles.
Il-mistoqsija żvelat diviżjonijiet profondi fost il-partiti politiċi li normalment ikunu allinjati bil-maġġoranza tal-Membri Parlamentari jinsabu f’diżgwid bejniethom.
Il-Prim Ministru Keir Starmer fil-passat kien indika li kien favur din il-liġi iżda minn mindu ġie elett irrifjuta li jgħid kif se jivvota.
Is-Segretarju tas-Saħħa tal-Istat Wes Streeting, li jekk dan il-vot jgħaddi jkun responsabbli mill-implimentazzjoni tiegħu, iddikjara li kien se jivvota kontra hekk kif qed isostni li s-sistema Ingliża tal-kura fl-aħħar tal-ħajja m’għandiex ir-riżorsi biex timplimenta din il-leġislazzjoni.
L-eks Prim Ministri Ingliżi għandhom opinjonijiet differenti fejn Boris Johnson u Theressa May jgħidu li jekk jingħataw iċ-ċans jivvutaw kontra filwaqt li l-ġimgħa l-oħra David Cameron ippublika opinjoni fit-Times fejn qal li biddel fehmtu u issa jinsab favur l-abbozz.
Id-dibattitu mistenni jieħu mill-anqas ħames sigħat u aktar minn 150 Membru Parlamentari rreġistraw biex jitkellmu f’dik li mistennija tkun sessjoni mimlija emozzjonijiet.
Madwar 100 Membru Parlamentari jinsabu ndeċiżi b’ħafna minnhom se jkunu qed jieħdu deċiżjoni eżatt qabel jivvutaw.
Jekk il-vot jgħaddi, l-abbozz ikun skrutinizzat aktar fiż-żewġ kmamar tal-Parlament u jekk approvat jidħol fis-seħħ fi żmien sentejn jew tliet snin.
Ir-Renju Unit mhuwiex l-unika pajjiż fl-Ewropa li riċentament qed jikkunsidra li jawtorizza l-mewt assistita hekk kif Membri Parlamentari fl-Irlanda aktar kmieni din is-sena approvaw rapport parlamentari fuq l-istess binarju. Fi Franza, dibattitu dwar is-suġġett kien interrot meta ingħajtet elezzjoni bikrija.
L-Awstrija, Belġju, Kanada u partijiet mill-Istati Uniti diġa għandhom illegalizzat is-suwiċidju assistiet b’diversi regoli varji dwar min hu eliġibbli għal din il-proċedura.
