F’intervista ma’ Jon Mallia, id-Deputat Nazzjonalista Darren Carabott sostna li hu jemmen li l-ħajja fuq il-gżira Griega ta’ Kreta hi aħjar minn dik f’pajjiżna. Dan għax mar btala ftit ilu u ħass li hemm kwalità ta’ ħajja aqwa u inqas kriminalità, skontu.
Qal, “L-island life ntilfet. Dan is-sajf mort Kreta. Fl-aħħar tħossok, issa mhux għax qiegħed holiday ta, imma veru tħoss li hemm dik l-istil ta’ ħajja kajmana.”
Minn riċerka, li għamel ONE News dwar il-qagħda fi Kreta f’rapporti s-sena l-oħra, ħareġ li dak li ma qalx Carabott hu li f’din il-gżira kien hemm rata ta’ qgħad li taqbeż it-tnax fil-mija jew madwar ħames darbiet aktar minn dik f’pajjiżna.
Fost iż-żgħażagħ minn Kreta, ir-rata tal-qgħad titla’ għal ħamsa u għoxrin fil-mija, b’riżultat li ħafna spiċċaw jemigraw minħabba n-nuqqas ta’ opportunatijiet offruti. Dan ifisser li wieħed minn kull erba’ żgħażagħ fi Kreta jiddependu fuq il-benefiċċji tal-qgħad.
Ir-rata tal-popolazzjoni fi Kreta, li skont il-Eurostat, tinsab f’sitwazzjoni ta’ riskju ta’ faqar jew esklużjoni soċjali hi ta’ madwar darba u nofs dik f’pajjiżna. Dan filwaqt li l-livell tal-Prodott Domestiku Gross, ras għal ras, hu ftit aktar minn nofs dak ta’ Malta.
Fi Kreta, madwar wieħed minn kull disgħa, hu meqjus f’sitwazzjoni ta’ ċaħda materjali severa. Dan ifisser li ma jiflaħx iħallas għall-kontijiet tad-dawl, isiefer jew ilaħħaq ma’ spejjeż essenzjali.
Dejjem skont il-Eurostat, ir-rata ta’ attakki fiżiċi rrapportati lill-Pulizija fi Kreta hi darba u nofs dik f’pajjiżna, filwaqt li l-ammont ta’ serq ta’ karozzi, ras għal ras, hu saħansitra d-doppju ta’ dak f’Malta.
F’rapport mxandar mill-BBC, ftit tas-snin ilu, student fl-Università ta’ Kreta kien sostna li tant hemm problema ta’ nuqqas ta’ housing fil-gżira li spiċċa jorganizza ma’ studenti oħrajn protesti fil-belt ta’ Chania. Dan għax ma jaffordjawx il-kirjiet f’din l-akbar gżira fil-Greċja.
Dan kollu juri kemm dak li suppost hu wieħed mill-aħjar elementi tal-Partit Nazzjonalista, tant li nħatar mill-partit biex ikun il-President tal-Kumitat għall-Kontijiet Pubbliċi fil-Parlament, fil-fatt jagħmel stqarrijiet mingħajr ma jiċċekkja fatti bażiċi dwar dak li jkun qed jgħid.
Bħal Bernard Grech, li wkoll jiftaħar li jgħid li hu Grieg, Carabott ħsiebu biss biex ipinġi lil pajjiżna agħar minn postijiet fejn, fil-verità, il-familji sfortunatament għaddejjin minn sitwazzjonijiet finanzjarji diffiċli.
Ukoll l-istess Darren Carabott, il-filjozz ta’ Claudio Grech u Austin Gatt, qed jitqies bħala papabbli biex jitpoġġa Kap flok Bernard Grech. Dan hekk kif l-establishment issa qed jimbottawh biex jilħaq Kap Nazzjonalista, wara l-elezzjonijiet tat-8 ta’ Ġunju li ġej.
